Хорих 461-р ангид цагийн хуваарьт ажил нэрийдлээр хоригдлуудыг дэглэж, эрүүдэн шүүдэг байж болзошгүй нөхцөл байдал ажиглагджээ

Хорих ангиудад эрүү шүүлтээс урьдчилан сэргийлэх үндэсний ажиллагааны хүрээнд Хүний эрхийн үндэсний комиссоос хяналт, шинжилгээ хийжээ. Хяналтаар хоригдлуудыг залхаан цээрлүүлж, дэглэдэг байдал ажиглагджээ.

 Уг асуудлаар  ХЭҮК-ын Эрүү шүүлтээс сэргийлэх асуудал эрхэлсэн гишүүн Я.Цэлмэн: Хорих 461-р ангид бид ажиллахад цагийн хуваарьт үйл ажиллагаа нэрийдлээр хоригдлуудыг өдрийн турш нэг газарт суулгаж, шингэн зүйл уух,  бие засах, биеийн чилээ гаргах, хөдөлгөөн  хийх боломжгүйгээр хязгаарлаж байна гэдгийг хоригдлууд санал хүсэлтээрээ илэрхийлсэн. Хүний хөдөлгөөнийг удаанаар хязгаарлаж хуулиар хориглоогүй бусад жам ёсны эрхийг хязгаарлаж байгаа нь хүний эрхийн зөрчил мөн. Тэр дундаа гэмт хэрэг үйлдээд, гэм буруутай нь тогтоогдож хоригдож буй хоригдлуудыг давхар залхаан цээрлүүлж байгаа нь эрүүдэн шүүлтийн нэг хэлбэр гэж хэлж болно. Тиймээс хоригдлын жам ёсны эрхийг хангаж, үйлдсэн гэмт хэрэгт нь тохирсон сургалт нөлөөллын ажлыг зохион байгуулах нь зүйтэй гэдэг байр суурьтай байна. Мөн хаалттай хорих ангид цагдан хоригдож буй хүмүүсээс асуумж авахад нийтлэг ажиглагдсан зүйл нь  “үндэслэлгүйгээр цагдан хоригдсон” гэдэг зүйлийг асуумжид бичсэн байгаа юм. Мөн удаан хугацаанд цагдан хоригдож, цагдан хорих хугацаа нь хэтрээд байна гэдэг саналууд ирсэн. Цагдан хоригдож буй хүмүүсийг 18 сараас хэтрүүлэхгүй цагдан хорино гэдэг хуулийн заалт бий.