Ж.Мөнхбат: Э.Цэндбаатарт шууд машин аваад өгөх мөнгө байхгүй, ер нь ч тэгээд машин өгөх албатай ч биш

ДАШТ-ний хүрэл медальт, Азийн наадмын болон Азийн аварга, ОУХМ, гавьяат тамирчин Э.Цэндбаатар өнгөрөгч нэгдүгээр сард гавьяатынхаа найрыг тэмдэглэсэн. Харин энэ үеэр УИХ-ын гишүүн Ж.Мөнхбат Ё.Баатарбилэг,  нар шинэхэн гавьяатад "Сүзүки" маркын автомашин бэлэглэж буйгаа мэдэгдэж тухайн үедээ олны сайшаалыг хүртээд байсан.

Тэгвэл өнөөдрийг хүртэл бэлэг болгон амласан автомашинаа гавьяат тамирчинд өгөөгүй байгаа тухай олон нийтийн мэдээллийн хэрэгслээр бичигдэж буй. Тухайн үед дээрх гишүүд "Э.Цэндбаатарт бэлэглэх "Сүзүки" маркын автомашин Баянзүрх дүүрэгт түгжрээд ирж байгаа" гэж хэлж байсан бол чухам ямар шалтгааны улмаас өнөөдрийг хүртэл амласан бэлгээ бариагүй байгаа талаар тодруулахад "Тухайн үед нутгийн зөвлөлөөс машин өгнө гээд батламжийг нь гардуулсан. Автомашин түгжрээд ирж байгаа гэж хэлсэн нь батламжийг нь авч ирж яваа хүн замын түгжрэлд орчихлоо. Удахгүй ирнэ гэж хэлсэн юм шүү дээ. 

Тэгээд ч бид төсвийн мөнгөөр авч өгөх биш. Энэ хугацаанд Э.Цэндбаатар хоёр ч удаа ирж уулзсан. Нутгийн зөвлөл бол иргэдээсээ хандив цуглуулж байгаад шагналыг чинь шийдвэрлэж өгнө гэдгээ хэлсэн. Бид Цэндбаатарын нэрийг барьж, PR хийнэ гэж юу байхав.  Ингэн барин хүнд юм өгөх албатай ч биш. Хэрвээ мөнгө нь бүрдвэл Архангай аймагт хэрэгтэй байгаа түргэн тусламжийн машиныг нь аваад өгчихдөг юм билүү гэсэн бодолтой байгаа. Бид Э.Цэндбаатарт өргүй. Ямар залилан хийсэн биш" хэмээсэн юм.