Хөвсгөл нуурын бохирдлыг цэвэрлэхэд Япон улс дэмжлэг үзүүлж, хамтран ажиллана

Монгол Улсын Засгийн газрын 2020-2024 оны үйл ажиллагааны хөтөлбөрт Хөвсгөл нуурт живсэн тээврийн хэрэгслийг илрүүлэх, байршлыг тогтоох ажлыг тусгасны дагуу БОАЖЯ, Онцгой байдлын ерөнхий газар хамтран өнгөрсөн долдугаар сараас судалгааны ажлыг эхлүүлсэн.

Тус судалгаанд нэн шаардлагатай багаж, тоног төхөөрөмжийг нийлүүлж, дэмжлэг үзүүлэх талаар Япон Улсын Засгийн газар, Жайка болон бусад холбогдох байгууллагуудтай хамтран ажилллаж байна.

Үүнтэй холбогдуулан Япон Улсын “Ниппон салвэйж” компанийн урилгаар живсэн тээврийн хэрэгсэл, машиныг татан гаргахад шаардлагатай тоног төхөөрөмж, багажийг судлахаар ОБЕГ-ын тэргүүн дэд дарга, бригадын генерал Ж.Чүлтэмсүрэнгээр ахлуулсан баг энэ сарын 17-22-ны өдрүүдэд тус улсад ажиллаж байна.

Ажиллах үеэрээ “Ниппон салвэйж” компанийн үйл ажиллагаа болон далайд живсэн хөлөг онгоцыг татан гаргах ажиллагааны туршлага, татан гаргах ажиллагаанд ашиглагддаг тоног төхөөрөмжтэй танилцаж, цаашид хамтран ажиллах талаар санал солилцлоо.

Мөн нуурт живсэн тээврийн хэрэгсэл, машины байршлыг нарийвчлан тогтооход шаардлагатай судалгааны арга зүй болон цаашид ашиглагдах багаж, тоног төхөөрөмжийн талаар Жайка болон төслийн худалдан авах ажиллагааг зохион байгуулдаг JICS-ийн мэргэжилтнүүдтэй уулзалт хийж, харилцан туршлага мэдээлэл солилцлоо гэж Онцгой байдлын ерөнхий газраас мэдээллээ.