Б.Жавхлан: Дарханы арьс, ширний цогцолбор төсөлд зарим улстөрч оролцож, гацаасан

 Сангийн сайд Б.Жавхлан Дарханы арьс, ширний цогцолбор төслийн талаар сэтгүүлчдэд мэдээлэл өглөө.

Тэрбээр "Дарханы арьс, ширний цогцолбор төслийг цаашид аль болох төсвийн хөрөнгө оруулалт, төсвийн худалдан авалтаас холуур байлгах хэрэгтэй.Аль болох төр, хувийн хэвшлийн түншлэл, болж өгвөл хувийн хэвшлийн хөрөнгө оруулалтаар явуулах бодлого барина. Өөрөөр хэлбэл, тэнд хувийн хэвшил хөрөнгө оруулалт хийгээд бизнес хийх орчныг нь бид бодлого, эрх зүйн зохицуулалт, дэд бүтцээр нь дэмжиж өгнө. Ийм байдлаар явах нь зүйтэй. Өмнө нь Хөгжлийн банкны санхүүжилт аваад хувийн хэвшлийн хөрөнгө оруулалтаар явж байсан. Дараа нь дахин өөрчлөлт ороод, хоёр салгаад буюу хувийн хэвшил нэг хэсэг дээр нь, нөгөө хэсэг дээр нь төрийн өмчийн 100 хувь хөрөнгө оруулалтаар нэг аж ахуйн нэгж байгуулсан нь одоо ийм байдалтай байна. Тиймээс төсвөөс хол байгааг дахин хэлье" гэдгийг тодотгов. 

Түүнчлэн цааш хэлэхдээ "Төсвөөс хөрөнгө оруулах болон худалдан авах ажиллагаа хийгдэх шаардлага, тийм эрх зүйн орчин ч байхгүй. Гэхдээ энэ төслийн хувьд уг нь өөрөө, өөрийгөө аваад явах бүрэн боломжтой төсөл байгаа юм. Харамсалтай нь энэ сайн төсөл сайн явж өгөхгүй, ТЭЗҮ нь өнөөдрийг хүртэл гараагүй байгаа. Шинэ сэргэлтийн бодлогын хүрээнд хөдөө аж ахуйн гаралтай түүхий эд боловсруулах  энэ цогцолбор 10 мянган арьс, шир, түүхий эд жилд боловсруулах хүчин чадалтай, том объект босно. Харамсалтай нь манай  зарим нэг улстөрч үүнд оролцож,  өмнө нь байсан бизнес дизайн загвар нь өөрчлөгдсөн. Үүний улмаас саатсан, хугацаа алдсан, хойшилсон асуудал үүсэж байгаа. Энэ нь  цаг хугацааны бодитой хохирол авчирна. Тиймээс цаашид яаралтай энэ төслийн ТЭЗҮ-г дуусгаад цааш явна, явахгүй гэдгээ тодорхой болгох шаардлагатай. Засгийн газар ойрын хугацаанд шийдвэрлэнэ. Засгийн газрын тогтоолоор "Эрдэнэт" үйлдвэрээс 50 тэрбум төгрөг гаргаж, цогцолборын үйл ажиллагааны зардлыг хариуцах шийдвэр нь гарсан хэдий ч хэрэгжилт нь тун хангалтгүй байна" гэлээ.