ТЦА: Охины гэмтэл хөнгөн гэж гарсан тул нэмэлтээр шинжээч томилуулан ажиллаж байна

Тээврийн цагдаагийн албаны мөрдөн шалгах хэлтсийн дарга В.Хосбаяр: Долоон тээврийн хэрэгсэл, хоёр хүүхдийн эрүүл мэндэд хохирол учруулсан асуудлыг шалгаж байгаа. Эхний байдлаар ирсэн шинжээчийн дүгнэлтээр 12 настай хүүхдэд гэмтлийн хөнгөн зэргийн хохирол учирсан. Тодруулбал, зүүн өвдөг шарх, баруун өвдөг зулгаралт шарх үүссэн нь тогтоогдсон. Шинжээчийн дээрх дүгнэлтэд тулгуурлаж, хохирогчийн гэр бүлээс нэмэлт шинжилгээний дүгнэлтүүдийг хүлээн авсан. Үүнийг прокурорын байгууллагад өгч, нэмэлтээр шинжээч томилуулан ажиллаж байна. Мөн тухайн өдөр С охинтой хамт явсан Э охинд гэмтлийн зэрэг тогтоогдоогүй. Шинжээч томилон, цагдаагийн байгууллагаас мөн шалгаж байгаа. Тухайн хэрэг дээр иргэдийн эрүүл мэндэд хохирол учирснаас гадна долоон машины эд ангийн хохирол учирсан. Энэ нь урьдчилсан байдлаар 117 сая төгрөгтэй тэнцэж байна. Эрүүгийн тухай хуулийн 27.10.2-т зааснаар шинжээчийн дүгнэлт гарсаны дараа Эрүүгийн хэрэгт тухайн жолоо барьж явсан хүнийг яллагдагчаар татахаар санал хүргүүлэхээр ажиллаж байгаа болохыг мэдэгдэж байна. Мөн М гэгчийн найз залуу Б хариуцлагаас бултана гэж байхгүй, хариуцлага хүлээнэ.