ТЦА: Ланд-200 маркийн автомашиныг анхнаасаа М гэгч эмэгтэй нь жолоодож байсан нь бичлэгээр нотлогдсон

Тээврийн цагдаагийн албаны дарга, хурандаа О.Ганбат: Энэ сарын 10-нд "Олимп" хотхоны арын замд гарсан осол хэрэгтэй холбогдуулан нийгэмд үл итгэлцэл үүсээд байгаа учир Прокурорын зөвшөөрлөөр мэдээлэл өгье. Мэдээллийг баримтад тулгуурлан мэдээлж байна. 7 машин хоёр хүүхдийг мөргөсөн жолооч нь анхнаасаа унаад хөдөлж байгаа нь бичлэгт байгаа. Ланд-200 маркийн машин хөдөлгөөн хийхээс өмнө эхлээд Б гэгч суугаад урд, хойд ханаа мөргөж буй бичлэг бий. Улмаар зорчигчийн суудлаас М гарч жолооны ард суугаад, машиныг жолоодоод явж байгаа бичлэг байгаа. М гэгч нь жолоодоод Зүүн дөрвөн замын уулзвараар Нарантуул, Нарантуулаас Ихмонголын уулзвар хүртэл хөдөлгөөн хийгээд Олимп хотхоны уулзвар хүртэл жолоодож явсан нь тогтоогдсон.

ЦЕГ-ын хэвлэл мэдээллийн албаны дарга Х.Баатархүү: Ослын мөрдөн шалгах ажиллагааны хүрээнд шинэ баримт гарч ирсэн. Энэ нь анх жолоодох эрхгүй Б гэгч автомашиныг эхэлж хөдөлгөөнд оролцуулсан. ҮҮнээс шалтгаалж М гэгч жолоог шилжүүлж авсан нөхцөл байдал тогтоогдсон. Энэ нь камерын бичлэгээр бүрэн тогтоогдож байгаа. Хөдөлгөөнд оролцож осол гаргах хүртэл М гэгч машинд ганцаараа байсан нь тогтоогдсон. Б гэгч өөр машинд суугаад явсан.Мөн олон нийтийн цахим хуудаст М гэгч цагдаагийн байгууллагатай холбоотой мэдээлэл гарч байна. Энэ нь ташаа мэдээлэл гэдгийг мэдэгдэж байна. Ослын мөрдөн шалгах ажиллагаанд хөндлөнгөөс оролцох ямар ч боломжгүй.

Хэвлэлийн хурлыг үзэх: