Тодруулга: С охин хөлөө тайруулна гэдэг нь ташаа, охины баруун хөлөнд зулгаралт үүссэн ч яс нь хугараагүй

Энэ сарын 10-нд БЗД-ийн "Олимп" хотхоны арын замд "Ланд-200" маркийн автомашин урсгал сөрөн 7 машин мөргөж, 12 настай хоёр охиныг мөргөж, дайрч гэмтээсэн ноцтой осол гарсан. Бид охидын биеийн байдлын талаар эх сурвалжаас тодрууллаа.

Ланд-200 маркийн автомашинд замын хажуугаар нэдрэгдэн дайруулсан С охин өнөөдрийн байдлаар /2022.10.17/ ГССҮТ-д хэвтэн эмчлүүлж байна. Охин эхний хэд хоног цочиж, орилж, уйлж шоконд орсон байдалтай байжээ. С охины биеийн байдал баруун хөлнийхөө хоёр хэсэгт том хэмжээний зулгаралттай, гуяны дотор хэсэгтээ мөн том хэмжээний оёдолтой байгаа юм. Азаар ясандаа хугарал аваагүй байна. 12 настай охид тухайн өдөр хамт хичээлээ тарж яваад явган хүний зам дээр уг осол болжээ. С охин өнгөрсөн Даваа гарагт Шүүх эмнэлэгт шинжилгээ өгсөн бөгөөд шинжилгээний хариу нь гараагүй байгаа юм байна. 

Харин 12 настай С охины найз Э охин гэмтэл аваагүй ч, биед нь доргилт үүссэн байж болзошгүй учир гадуур эмчлүүлж байгаа гэх мэдээлэл бий.

  Мөн охидын сэтгэл санаа тогтворгүй байгаа учир олон нийтийн мэдээллийн хэрэгслээр худал мэдээлэл түгээхгүй байхыг хүсчээ.

Охидыг дайрсан эмэгтэйн тухайд 1993 онд төрсөн бөгөөд жолооны үнэмлэхгүй, найз залуугаараа согтуу машин бариулахгүйн тулд өөрөө машинаа жолоодож явсан гэх мэдээлэл бий. Мөн тухайн үед осол гаргасан эмэгтэйн найз залуу нь Ланд-200 маркийн автомашиндаа хамт зорчиж яваагүй бөгөөд найзынхаа машинтай хойно нь явж байсан гэх мэдээлэл бий.