Галт тэрэг солилцоо хоногт 14 болж нэмэгдээд байна

Хөрш орнуудтай хилийн боомтуудын төмөр замаар солилцож байгаа экспорт, импортын ачаа тээврийн хэмжээ нь манай улсын эдийн засгийн хөгжилд чухал үүрэгтэй юм. Тийм ч учраас хөрш орнуудын хилийн өртөөдийн төмөр замаар солилцох галт тэрэгний тоог нэмэгдүүлэхэд “Улаанбаатар төмөр зам” ХНН-ийн зүгээс онцгой анхаардаг. Цар тахлын халдварыг хумих зорилгоор БНХАУ өнгөрсөн оны 11 дүгээр сарын 28-ны өдрөөс Замын-Үүд – Эрээн өртөөний өргөн царигаар хүлээн авах галт тэрэгний тоог хоногт 8 болгож огцом бууруулсан нь манай улсын экспортын тээврийн хэмжээ эрс буурахад хүргэсэн юм. Энэ асуудалд “Улаанбаатар төмөр зам” ХНН онцгой анхаарч, галт тэрэг солилцоог нэмэгдүүлэхийн төлөө шаргуу ажилласны үр дүнд  Замын-Үүд-Эрээн өртөөдийн галт тэрэг солилцоо сайжирч, өнгөрсөн сарын 24-нөөс хоногт 14 галт тэрэг хятадын талд хүлээлгэн өгч байна. Гэхдээ 14 гэдэг эцсийн тоо биш. Саяхан БНХАУ-ын тал Эрээн өртөөний хүчин чадлыг нэмэгдүүлэх өргөтгөлийн ажлыг хийж дууссан нь галт тэрэг солилцоог ахиад ч нэмэгдүүлэх боломжийг бүрдүүлсэн тул хоногт солилцох галт тэрэгний тоог цаашид улам нэмэгдүүлэх асуудлаар УБТЗ-ын зүгээс хятадын талтай ярилцаж байна.