Д.Амарбаясгалан: "Өргөө" амаржих газарт ЗГХЭГ-аас яаралтай шалгалт оруулах ажлын хэсэг байгуулсан

Нийслэлийн “Өргөө” амаржих газрын дарга Ж.Энхцэцэгийг ёс зүйн алдаа гаргасан гэх зэрэг үндэслэлээр үүрэгт ажлаас нь чөлөөлсөн.  Түүний оронд "Амгалан" амаржих газрын даргаар ажиллаж байсан Ц.Батболдыг түр томилсон байна.

Тэгвэл Өргөө амаржих газрын асуудлаар  Засгийн газрын хэрэг эрхлэх газрын дарга Д.Амарбаясгалан  хэвлэлд өгсөн яриандаа байр сууриа илэрхийлжээ. Тэрбээр "Засгийн газрын хэрэг эрхлэх газраас яаралтайгаар шалгалт оруулна. Өнөөдөр яаралтай Ажлын хэсэг байгуулаад оруулна гэсэн чиглэлийг өгсөн. Үнэхээр ажлаа явуулахын тулд ажлын байран дээр зөв шаардлага хандлагыг тавьж ажиллаж байсан захирлын ажлыг өөрчилсөн байх тохиолдолд бид эргэж харах ёстой. Ер нь төрийн аливаа түвшинд хариуцлагын тогтолцоо маш их суларсан байгаа гэж үзэж байгаа" гэж ярьжээ. 

“Өргөө” амаржих газрын даргаас чөлөөлөгдсөн Ж.Энхцэцэг дээрх шийдвэртэй санал нийлэхгүй байгаагаа илэрхийлсэн. Тэрбээр "Өргөө" амаржих газар бугшсан асуудлыг шийдвэрлэсэн гэж харж байгаа. Ажлаас гарсан эмнэлгийн ажилтнууд үгсэн хуйвалдаж салбар яаманд миний эсрэг гомдол гаргасан. Алдаа гаргасан эсэхийг Ёс зүйн хороо шалгасан ч худлаа үндэслэл гаргасан. Архи уудаг, хувийн эмнэлэг ажиллуулдаг албан тушаалтнуудад би хариуцлага тооцсон.  Салбар яаманд  би гомдож байна. Гомдол гаргасан хүмүүсийг албан ёсоор надад хэлээгүй, уг нь ил тод байх ёстой. Шалгалтын дүнтэй би санал нийлэхгүй. Цөөн хэдэн хүний эрх ашиг зөрчигдсөн учраас ҮЭБ-ыг урдаа барьсан. Ажилчдын эрх ашгийг хамгаалах ёстой байгууллага нь ямар ч баримтгүй асуудалд хандаж байгаа" гэв.