ГХЯ: Монгол Улс НҮБ-ын Хүний эрхийн зөвлөлийн 2023-2025 оны гишүүний сонгуульд нэрээ дэвшүүлээгүй

Хэвлэл мэдээллийн хэрэгслээр Монгол Улс НҮБ-ын Хүний эрхийн зөвлөлийн гишүүний сонгуульд нэрээ дэвшүүлж, нэг санал авч унасан тухай мэдээ гарсан. Энэ тухай мэдээлэлд ГХЯ-ны  Олон талт хамтын ажиллагааны газрын захирлын албан үүргийг түр орлон гүйцэтгэгч Б.Мандхай дараах тайлбарыг өгөв.

 Тэрбээр "НҮБ-ын Хүний эрхийн зөвлөл (ХЭЗ)-ийн 2023-2025 оны гишүүний сонгууль энэ оны 10 дугаар сарын 11-ний өдөр Нью-Йорк хотноо болсон. Энэ удаагийн сонгуульд бүс нутгийн 5 бүлгээс нийт 17 улс нэрээ дэвшүүлж, 14 суудлын төлөө өрсөлдсөн. Монгол Улсын харьяалагддаг Ази, Номхон далайн орнуудын бүлгээс Бангладеш 160, Мальдив 154, Вьетнам 145, Киргиз 126 санал авч сонгогдсон.

Африкийн орнуудын бүлгээс Өмнөд Африк 182, Алжир 178, Марокко 178, Судан 157,  Зүүн Европын орнуудын бүлгээс Гүрж 178, Румын 176, Латин Америк, Карибын орнуудын бүлгээс Чили 144, Коста Рика 134, Баруун Европын болон бусад орнуудын бүлгээс Бельги 169, Герман 167 улсын санал тус тус авч сонгогдсон. Монгол Улс НҮБ-ын Хүний эрхийн зөвлөлийн 2023-2025 оны гишүүний сонгуульд нэрээ дэвшүүлээгүй" гэжээ. 

Түүнчлэн Монгол Улс 2015 онд болсон НҮБ-ын ХЭЗ-ийн 2016-2018 оны гишүүний сонгуульд нэрээ дэвшүүлж, НҮБ-ын гишүүн 192 улсаас 172 улсынх нь саналыг авч сонгогдон, 3 жилийн хугацаанд амжилттай ажиллажээ.