Г.Амартүвшин: Дампуурлын хуулиар компаниуд дахин бизнесээ босгох боломж бүрдэнэ

УИХ-ын чуулганы нэгдсэн хуралдаанаар Дампуурлын тухай хуулийн шинэчилсэн найруулга буюу Төлбөрийн чадваргүйдлийн тухай хуулийн төслийн хэлэлцэх эсэхийг нь хэлэлцсэн.Дампуурлын тухай хууль 1997 онд батлагдсан бөгөөд 25 дахь жилдээ зарчмын шинжтэй шинэчлэлтийг хийж байгаа юм.

Хуулийн төслөөр хуулийн этгээдийн төлбөрийн чадвартай эсэхийг тогтоох, төлбөрийн чадваргүйдлийн хэргийг шүүхэд хянан шийдвэрлэх, төлбөрийн чадваргүйдлийн ажиллагаа эхлүүлэх, үүрэг гүйцэтгүүлэгчийн хурал, төлбөрийн чадваргүй этгээдийг татан буулгах зэрэг харилцааг зохицуулна. Банкны системтэй холбоотой асуудлаар банкны дампуурлыг Банкны тухай хуулиар зохицуулах, салбарын онцлогоос шалтгаалж, санхүүгийн байгууллага, шашны байгууллага, төрийн нэгдсэн эмнэлэг, хувийн эмнэлэг, төрийн болон орон нутгийн өмчит компаниуд, хуулийн этгээдүүдийн нийтлэг харилцааг энэ хуулиар зохицуулна.

Хуулийн төсөлтэй холбогдуулан УИХ-ын гишүүн Г.Амартүвшин дараах байр суурийг илэрхийллээ. 

Тэрбээр "Одоо үйлчилж байгаа дампуурлын хуулиар компаниуд төлбөрийн чадваргүй болсон тохиолдолд шууд татан буулгах арга хэмжээ авдаг. Харин төлбөрийн чадваргүйдлийн хуулийн шинэчилсэн найруулгын төслөөр дампуурлаа зарласан компаниуд дахин бизнесээ амилуулах боломж гарч ирж байгаа нь маш зөв. Тухайн төлбөрийн чадваргүй болсон компанид зээл олгосон банкнууд, бусад байгууллагуудын нэхэмжлэлийн эрэмбэ дарааллыг зөв тогтоох тал дээр ажлын хэсэг илүүтэй анхаарал хандуулж ажиллах шаардлагатай" гэлээ.