Хүүхдийн мөнгийг архи, тамхины хэрэглээнд зарцуулахыг хуулиар хориглоно

2023 оны төсөвт хүүхдийн мөнгөнд 1.2 их наядыг төсөвлөсөн. Энэ бол нийт хүүхдүүдийн 91 хувьд хүүхдийн мөнгө олгох тооцоо юм. Харин өрхийн сарын орлого нь 3.5 саяас дээш өндөр орлоготой өрхүүдийн хүүхдүүдэд хүүхдийн мөнгө олгохгүй байхаар болж байна. Энэ нь үлдсэн есөн хувь нь юм.

Ийн аав, ээжийнх нь орлогоор ялгаварлан хүүхдийн мөнгө олгох гэж буйг зарим УИХ-ын гишүүн шүүмжилж байгаа бол  нөгөө хэсэг нь  эсрэгээрээ  бууруулах шаардлагатай гэж үзэж буй. Төсвийн хэлэлцүүлгийн эцэст нийт хүүхдүүдийн 91 хувьд олгох уу үгүй юу гэдэг нь тодорхой болно. 

Түүнчлэн ирэх оны төсвийн төсөлтэй хамт Хүүхдийн мөнгөн тэтгэмжийн талаар авах зарим арга хэмжээнд өөрчлөлт оруулах тогтоолын төслийг өргөн мэдүүлжээ. Уг тогтоолын төсөлд:

Хүүхдийн мөнгөн тэтгэмж олгох үйл ажиллагааг дараах хэлбэрээр зохион байгуулахыг Монгол Улсын Засгийн газар /Л.Оюун-Эрдэнэ/-т даалгасугай:
1/өрхийн амьжиргааны түвшинг нарийвчлан тооцохдоо өрхийн мэдээллийн нэгдсэн сан болон төрийн мэдээллийн бусад санг ашиглан бүрдүүлэх;
2/хүүхдийн мөнгөн тэтгэмжийг хүүхдийн мөнгөн хуримтлал болон бусад хэлбэрээр хадгалах, хөрөнгө оруулалт хийх боломжийг олгох;
3/хүүхдийн мөнгөн тэтгэмжийг согтууруулах ундаа, тамхины хэрэглээнд зарцуулахыг хориглох;
3.Энэ тогтоол гарсантай холбогдуулан "Хүүхдийн мөнгөн тэтгэмжийн талаар авах зарим арга хэмжээний тухай" Монгол Улсын Их Хурлын 2019 оны 11 дүгээр сарын 28-ны өдрийн 96 дугаар тогтоолыг хүчингүй болсонд тооцсугай" гэжээ. 

Өөрөөр хэлбэл хүүхдийн мөнгө эцэг эхийнх нь архи, тамхины мөнгө болж очиж буй гэх шүүмжлэлийг  хуулиар хориглохоор оруулж иржээ.