Монголд орж ирсэн ОХУ-ын 1559 иргэний 69 нь оршин суух зөвшөөрөл авчээ

Монгол улсад орж ирж буй ОХУ-ын иргэдийн цуваа тасрахгүй байгаа юм. Манай улсад ОХУ-ын 1500 гаруй иргэн орж ирснээс 69 нь оршин суух хэлбэрийн визийн зөвшөөрөл авчээ.

Гадаадын иргэн харьяатын газрын Виз, зөвшөөрлийн газрын дарга Д.Алтанзул: МУ-ын визийн журам болон Гадаад иргэнийг МУ-д бүртгэх журмаар 8 багц 56 хэлбэрийн визийг оршин суух гадаад иргэдэд олгодог болсон. ОХУ-ын иргэд өнөөдөр 56 хэлбэрийн оршин суух зөвшөөрлийн хүсэлт гаргах боломжтой. Үүнд тавигдах шаардлага нь харилцан адилгүй байна. ОХУ, МУ-ын хооронд байгуулсан хэлэлцээрийн хүрээнд 30 хоногийн хугацаанд визгүй манай улсад зорчсон 1559 иргэнээс 69 иргэнд нь оршин суух хэлбэрийн визийн зөвшөөрөл олгосон байна. Үүнээс 65 нь суралцах хэлбэрийн зөвшөөрөл, 4 нь хөрөнгө оруулагч болон хөрөнгө оруулагчийн хамаарал бүхий этгээд байна. Гадаадын иргэний харьяатын эрх зүйн байдлын тухай хуульд зааснаар гадаадын иргэн МУ-д байхдаа нэг удаа 30 хүртэл хоногоор визээ сунгуулсан байх хэрэгтэй. Тухайн иргэнд олгосон сунгалтын хугацаа дууссан өдрөөс хойш 90 хоногийн дараа дахин хүсэлт гаргах эрх нь үүснэ. Тэгэхээр энгийн үед /цар тахлын бус үед/ тухайн иргэн Монголд байх визээ нэг удаа сунгуулсан бол дараагийн сунгах хүсэлт гаргахдаа заавал МУ-аас гараад дахин зохих ангилалын визтэй юм уу, эсвэл ОУ-ын хэлэлцээрийн дагуух нөхцөлөөр буцаж орж ирнэ гэсэн үг.

Монгол улс руу орж ирж буй иргэдийн дийлэнхи нь Монгол улсаар дамжин Солонгос, Турк, Америк улс руу гарах сонирхолтой байгаа бол зарим хэсэг нь ажил хийх сонирхолтой байна. Иргэдийн дунд Монгол улсад ховор нарийн мэргэжлийн инженерүүд байна.Тэдэнд тулгамдаж буй гол асуудал  хэлний мэдлэг. Хоёрдугаарт байрны асуудал байгаа аж.