УБ улсын дугаар шинээр авахад өндөр төлбөр төлдөг болно

Буруу талдаа жолооны хүрдтэй автомашиныг импортлохыг хориглох талаар яригдаад удаж байгаа ч тодорхой шийдвэрт хүрээгүй байсан юм. Тэгвэл уг асуудалд цэг тавьжээ. 

Энэ талаар Сангийн сайд Б.Жавхлан өгсөн мэдээлэлдээ "Түгжрэл ихтэй газар авто тээврийн хэрэгслийн хэрэглээг хязгаарлана гэдэг нь түгжрэл бууруулах суваг нь мөн. Гэхдээ яаж зохицуулах уу гэдэгт тооцоо, судалгаатай хандах шаардлагатай. Автомашины импортлохыг хориглож  эрхийг нь хязгаарлах цаг үе нь биш гэж харсан.  Харин оруулж ирсэн хойноо буюу Улаанбаатар хотод түгжрэл ихтэй газар унахад илүү өндөр байх ёстой. Улаанбаатарын дугаар авахад, түгжрэл ихтэй бүсүүдэд хөдөлгөөнд оролцуулбал илүү их төлбөр авдаг байх зохицуулалт нь зөв гэж шийдвэрлэсэн" гэж мэдээлсэн. 

Хот хариуцсан сайд  Ж.Сүхбаатарын хувьд Түгжрэлийн багц хуулийн төслийг боловсруулж байгаа бөгөөд ирэх арваннэгдүгээр сарын сүүлийн Засгийн газар танилцуулахаар төлөвлөжээ. Уг хуульд татвар, төлбөртэй асуудал тусгагдах юм байна. 

Түүнчлэн Нийслэлийн Засаг дарга бөгөөд Улаанбаатар хотын Захирагч Д.Сумъяабазар "Буруу талдаа жолооны хүрдтэй автомашиныг импортлохыг хориглох тухай асуудалд  нийгмийн сэтгэлзүйг мэдрэхийн тулд ард түмний хүсэл сонирхлыг мэдэхийн тулд би өөрөө зориуд хэлсэн. Түүнээс биш ийм бодлогоор цааш явна гэж байхгүй" гэдгийг өнгөрсөн долоо хоногт манай сайтад өгсөн яриандаа тодотгосон.