О.Мөнхжин: Бүх койныг сайн шалгаарай

Крипто зах зээлд IHC койныг гаргасан О.Мөнхжин, Б.Гантиг, Н.Эрхэмбаяр, Б.Идэр-Од нарыг мөнгө угаасан хэргээр шалгаж байгаа талаар бид мэдээлсэн билээ. 

Энэ талаар мөн ЦЕГ-аас тодруулахад "Койн, токен шинээр гаргаж, хөрөнгө төвлөрүүлсэн этгээдүүдтэй холбоотой хэргийг шалгаж байгаа. Цагдаагийн байгууллагаас Санхүүгийн зохицуулах хороо, Татварын ерөнхий газартай хамтран “Виртуал хөрөнгө гаргагч болон виртуал хөрөнгийн үйлчилгээ үзүүлэгч нарын татвар төлөлттэй холбоотой болон залилан мэхлэх гэмт хэргийн шинжтэй эсэхэд” шалгах ажиллагааг явуулж байна. Виртуал хөрөнгө буюу койн, токен шинээр гаргаж хөрөнгө төвлөрүүлсэн этгээдүүдтэй холбоотой хэрэг бүртгэлтийн хэрэг Цагдаагийн байгууллагад шалгагдаж байгаа бөгөөд мөрдөн шалгах ажиллагаа явуулж байгаа гэсэн мэдээллийг өгсөн. 

Тэгвэл үүнтэй холбоотойгоор  IHC койныг гаргасан О.Мөнхжин цахим орчинд байр сууриа илэрхийлжээ. Тэрбээр "Аа ер нь тэгээд шалгавал шалгана л биз дээ. Одоогоор бидэнд мэдэгдсэн зүйлгүй. Бүх койныг шалгаарай. Би анх гарч байхад нь л ганцаараа орилоод бараагүй олон луйвар бий. Хэн нь хэн бэ гэдэг нь танигдаад, гэм буруугүй нь тогтоогдвол бид улам л зах зээлийн итгэлийг авна. Бүхнийг хууль ёсны дагуу хийж, улсдаа хүртэл олон тэрбумын татвараа төлсөн. Өө нээрээ X-Meta бирж маань хүртэл өнөөдөр Санхүүгийн Зохицуулах Хорооноос “Виртуал Хөрөнгийн Үйлчилгээ Үзүүлэгч” гэсэн хууль зүй, албан ёсны бүртгэлээ авлаа. Хууль бус юм хийгээд байгаа хүмүүс ингэж явахгүй байх аа" гэжээ. 

Монгол Улсын хэмжээнд нийт 73 ширхэг койн гарснаас одоогийн байдлаар 36 койны арилжаа хийгдэж байна. Урьдчилсан худалдаа хийгдэж, хөрөнгө босгоод алга болсон дөрөв, анхдагч арилжаагаар мөнгө босгоод алга болсон дөрвөн койн тус тус байна. Мөн улсын хэмжээнд 23 крипто бирж байгуулагдсанаас гурав нь СЗХ-ноос зөвшөөрөл авч ажиллаж буй. Үндсэндээ үйл ажиллагаа нь үргэлжилж буй 16, аппликэйшн нь ажиллаж байгаа нэг, хаагдсан зургаан бирж байгаа талаар Виртуал хөрөнгө эзэмшигчдийн эрх ашгийг хамгаалах холбооноос мэдээлсэн билээ.