Д.Тогтохсүрэн: Тэтгэвэрийн нас нь болсон атлаа ажилласаар байгаа төрийн албан хаагчдыг чөлөөлнө

Улсын Их Хурал дахь Монгол Ардын Намын бүлгийн ээлжит хуралдаан өнөөдөр /2022.10.10/ боллоо. Бүлгийн хурлаар нэг асуудал буюу Монгол Улсын 2023 оны нэгдсэн төсвийн төсөл, түүнийг дагаж орж ирсэн хуулийн төслүүдийг хэлэлцсэн.

Энэ долоо хоногийн Мягмар гаригт Төсвийн байнгын хороо, Пүрэв гаригт Улсын Их Хурлын чуулганы нэгдсэн хуралдаанаар хэлэлцэнэ. Засгийн газраас өргөн барихдаа 2023 оны төсвийг дагаж нийт 102 хуулийн төсөл орж ирсэн. Үүний дотор Төрийн хяналт шалгалтын тухай хууль, Гүйцэтгэх засаглалын хяналтын тухай хууль гэсэн хоёр том хууль дагалдан орж ирж байна. Эдгээр хуультай холбоотой 82 хууль дагалдаж орж ирсэн. Дээрх хуулийн төслүүдийг УИХ дахь МАН-ын бүлэг бүлгийн хурлаараа хэлэлцээд Монгол Улсын 2023 оны төсвийг дагасан нийт дүнгээр нь 102 хуулийн төслүүдийг дэмжих нь зүйтэй гэж үзлээ.

Төсвийн хуулийг дагалдуулж Төрийн албаны тухай хуульд нэмэлт, өөрчлөлт оруулахаар болсон. 

Тус нэмэлт, өөрчлөлтөд ямар заалт орох талаар МАН-ын бүлгийн дарга Д.Тогтохсүрэнгээс тодруулахад тэрбээр "Төрийн албаны тухай хуульд хоёр өөрчлөлтийг оруулж байгаа. Ирэх жил орон нутгийн төсвийн албан хаагчдын цалинг 20 хувиар нэмэгдүүлэх төсвийг улсын төсөвт суулгасан байна. Харин 20-оос бусад хувиар орон нутгийн төсвийн боломжоор цалинг нэмэгдүүлнэ. 

55 нас хүрсэн эмэгтэй, 60 нас хүрсэн эрэгтэй тэтгэвэр тогтоолгосон хэрнээ давхар цалин авч байгаа тохиолдолд ажлаас нь чөлөөлөх тухай ийм өөрчлөлт оруулж байгаа нь зарчмын хувьд зөв" гэлээ.