​ "Хайрхан худалдааны нэгдсэн төв" ашиглалтад орсноор автозамын түгжрэл 40 хувь буурна

Нийслэлийн автозамын түгжрэлийг бууруулах, зах худалдааны төвүүдийн бөөгнөрлийг багасгах зорилтыг хэрэгжүүлж байгаа "Хайрхан худалдааны нэгдсэн төв"-ийн шав тавих ёслолын ажиллагаа боллоо. 

Нийслэлийн иргэдээс гадна баруун зүгт гарах 16 аймгийнханд зориулсан  тус "Хайрхан худалдааны нэгдсэн төв" ашиглалтад орсноор автозамын түгжрэл 40 хувь буурна.

Тус төвийг СХД-ийн 32 дугаар хороонд "Нью Фоос" ХХК, "Амэ Интернэшнл" ХХК-иуд өөрийн эзэмшлийн 348,000 мкв газарт хэрэгжүүлнэ. 

Хотын төвд байрлалтай захуудын төвлөрлийг сааруулж, авто машины замын түгжрэлийг бууруулахад чухал хувь нэмэртэйг онцлон эрх зүй, бодлогын хүрээнд дэмжихээ илэрхийлэн Нийслэлийн засаг дарга бөгөөд Улаанбаатар хотын захирагч Д.Сумъяабазар хамтран ажиллах санамж бичигт гарын үсэг зурсан билээ. 

“Нью фоос” ХХК-ийн гүйцэтгэх захирал Б.Эрдэнэбаатар “Хотын түгжрэлийг бууруулах, ажлын байрыг нэмэгдүүлэхэд чиглэсэн нийслэлийн удирдлагын бодлогод энэхүү төслийн ерөнхий агуулга нийцэж байгаа. Мөн хувийн хэвшлийнхэнд ч ашиг орлого олох боломж нээгдэнэ. 

Нийт 28 га газарт худалдааны төв үйл ажиллагаа явуулна. Өргөн хэрэглээний болон гэр ахуйн худалдааны төв А, Б блокт байрлана. 

Барилгын материал, авто сэлбэг, том хэмжээний агуулах худалдааны төлөвлөлтийг мөн хийсэн. Мах, ногоо, хүнсний захыг иж бүрэн байгуулна. Төслийн хүрээнд томоохон захуудын худалдан авагчдаас судалгаа хийсэн.

Судалгаанаас үзэхэд, хөдөө, орон нутгаас зорьж ирсэн хүмүүс тодорхой хувийг эзэлж байгаа. Тэдгээр иргэд заавал зах руу очих биш, энэхүү худалдааны төвөөс шаардлагатай бараа, материалаа авах боломжтой. Түгжрэл тэр хэрээр буурна. Энэхүү нэгдсэн төвд 2.8 га худалдааны талбай, мөн автомашины 1,200 зогсоол төлөвлөсөн” гэв.