Ж.Ганбаатар: АИ-92 шатахууныг таван жилийн турш 815 ам.доллараар худалдах гэрээ хийгдэнэ

Монгол Улсын 2023 оны төсвийн тухай, Нийгмийн даатгалын сангийн 2023 оны төсвийн тухай, Эрүүл мэндийн даатгалын сангийн 2023 оны төсвийн тухай хуулийн төслийн нэг дэх хэлэлцүүлгийг явуулж байна. 

Энэ үеэр УИХ-ын гишүүд "2023 онд түлш шатахууны нөөцийг хэрхэн шийдэх вэ, ханган нийлүүлэлтэд асуудал гарах уу гэдгийг тодрууллаа. 

Уг асуултад УУХҮ-ийн сайд Ж.Ганбаатар "Монгол Улсын шатахууны нийт хэрэглээ 1,5 сая тонн, шатах тослох материалтайгаа нийлээд 1,8 сая тонн байдаг. Ерөнхий сайдын ОХУ-д хийсэн айлчлалын үр дүнд шатахууны асуудлаар тогтвортой гэрээ байгуулах эхлэл тавигдсан. Энэ хүрээнд АИ-92 шатахууныг 815 ам.доллараар таван жилийн туршид хадгалах боломжтой. Энэхүү гэрээ хараахан байгуулагдаагүй яриа хэлцлийн шатанд яваа. Манай яамнаас дэд сайдаар ахлуулсан ажлын хэсэг ирэх долоо хоногт ААН-үүдийн төлөөллийн хамт ОХУ руу явж дээрх гэрээ хийгдэнэ. 

Дизель түлшний хувьд зах зээлийн үнээс 10 хувийн хямдралтай байгаа, дотоод зардлуудаа  Роснефть буулгасан нь урьд өмнө байгаагүй хямдралыг нийлүүлэгч талд үзүүлж байгаа гэсэн үг. Зах зээлийн үнэ 30 хувиар гурван сар дараалан савласан тохиолдолд үнээ эргэж харна гэж хэлцэлд тусгагдсан. Хэрвээ зах зээлийн үнэ тогтвортой байвал 2023 оноос эхлэн таван жилийн хугацаатайгаар шатахууны үнийг нийлүүлэгч талаас тогтвортой барина гэж гэрээгээр мөн тусгагдаж байгаа. 

Өнгөрсөн өдрүүдэд дизель түлшний үнэ 300-350 төгрөгөөр буурсан нь Ерөнхий сайдын айлчлалын үр дүнгийн нэг хэсэг гэж хэлж болно" гэлээ.