Ж.Батзандангийн ах Ж.Бат-Эрдэнэ Дарханы замын тендерээс их хэмжээний мөнгө авлигад авсан хэргээр шалгагдаж байна

Зам тээврийн хөгжлийн дэд сайд асан Ж.Бат-Эрдэнийг саатуулан шалгахаар болжээ. Тодруулбал, түүнийг ЗТХ-ийн сайдаар ажиллаж байхдаа Дарханы замын тендерээс их хэмжээний мөнгө авлига авч, бусдад давуу байдал олгосон мөн үндэслэлгүй хөрөнгөжсөн гэсэн үндэслэлээр шалгаж байгаа аж.

Үүнтэй холбоотойгоор түүнийг өнөө орой баривчилан саатуулна гэсэн мэдээлэл байгаа юм. 

Ж.Бат-Эрдэнэ нь УИХ-ын гишүүн асан Ж.Батзандангийн ах юм. Тэрбээр 2020 оны долдугаар сард тус яамны дэд сайдаар ажиллаж байгаад сарын өмнөхөн  Хүнс, хөдөө аж ахуй, хөнгөн үйлдвэрийн дэд сайдаар  томилогдсон.

Гэвч тэрбээр Дарханы замын тендерийн асуудалд оролцсон нь шалгалтын явцад тогтоогдсон тул ийнхүү баривчлагааг явуулж буй бололтой. 

Сануулахад, Ерөнхий сайд Л.Оюун-Эрдэнэ Улаанбаатар-Дархан-Уул чиглэлийн авто замын нөхцөл байдалтай өнгөрсөн зургадугаар сард танилцсаныхаа дараа энэхүү төслийн ажил удаашрахад хүргэсэн шалтгаан, алдагдсан боломжийн өртгийг тооцоолох, тендер сонгон шалгаруулалтыг зохион байгуулсан албан тушаалтнуудыг шалгаж, хариуцлага тооцох үүргийг АТГ-ынханд өгсөн. Үүний дагуу тус газраас холбогдох албан тушаалтнуудад хэрэг бүртгэлтийн хэрэг нээн, шалгаж эхлээд байсан юм.