Ч.Хүрэлбаатар: Нүүрсний бүх гэрээг цахимжуулж, бүртгэлгүй нүүрс хилээр гарахгүй

Засгийн газрын хуралдаанаас гаргасан шийдвэрийг танилцуулж байна.

Эдийн засаг, хөгжлийн сайд Ч.Хүрэлбаатар хэлэхдээ  тэрбээр "Засгийн газрын хуралдаанаар валютын нөөцийг нэмэгдүүлэх асуудлыг хэлэлцэж, тогтоол гаргалаа. Монгол Улсын тоон мэдээг харахаар экспортын хэмжээ өндөр мөртлөө түүнтэй нийцсэн хэмжээний валют орж ирж байна уу гэдгийг эхлээд нэлээн сайн анзаарсан. Тухайлбал, экспортын дүнг аваад үзэхээр 1.8 тэрбум ам.долларын нүүрс экспортоор гаргасан гэсэн тоон мэдээ байдаг. Энэ бол жишээ. Яг хэчнээн хэмжээний ам.доллар орж ирснийг зөвхөн нэг компани дээр судлахад  500-600 сая ам.доллар байх жишээтэй. Энэ зөвхөн нэг компанийн жишээ. Яагаад гурав дахин бага хэмжээний валют орж ирсэн бэ гэхээр хэд хэдэн шалтгаан байна. Нэгдүгээрт, нүүрсээ урьдчилаад зарсан нэг хэсэг байна. Өмнө нь байгуулсан гэрээний дагуу гаргасан гэсэн үг. Нөгөө хэсэг нь өмнөх жилүүд буюу  2018, 2019 онуудад зарсан нүүрс гарч байна. Гуравдугаарт, жишиг үнэ, гэрээний үнэтэй холбоотой зөрүүнүүд. Энэ бүгдээс шалтгаалж Монгол Улсын экспортод гарч буй нүүрсийг  тод болгож, цэгцлэх шаардлага байна. 

Уурхайн ам дээрээс зарагдсан нүүрс нэг тонн нь 71 ам.доллар. Харин хил үнээр 129 ам.доллараар зарж байна. Өөрөөр хэлбэл дунд нь 51 ам.долларын зөрүү гарна. Энэ нь тээвэрлэлттэй холбоотой. Монголын уурхайнууд аманд зарагдсан үнээр нүүрсээ зарвал тонн тутамд 71 ам.доллар, хил үнээр зарвал 129 ам.доллар. Тэгэхээр нэгт, хил үнээр зарсан валют Монголын банкинд орох зохицуулалт хийж буй. Хоёрт, бүх гэрээг цахимжуулж, гэрээний дагуу  бүх зүйл хилээр тээвэрлэгдэж гарна, бүртгэлгүй нэг ч нүүрс хилээр гарахгүй. Гэрээний дагуу тухайн нүүрс экспортод гарна.  

 Гуравт, бүх нүүрсийг биржээр дамжуулан зарах тогтолцоонд шилжинэ. Ирэх оны нэгдүгээр сарын 1-нээс энэ зохицуулалтыг эхлүүлнэ. Ингэж чадвал томоохон дэвшил гарна" гэлээ.