ТАНИЛЦ: АЙМГУУДЫН 2023 ОНЫ ТӨСӨВ

Ирэх оны төсвийг өнөөдөр /2022.09.29/ УИХ-ын даргад өргөн барина.
Олон улсын байгууллагууд дэлхийн эдийн засгийн хямралт нөхцөл байдал 2024 он хүртэл үргэлжилнэ хэмээн төсөөлж байгаа энэ үед Засгийн газраас төлбөрийн тэнцлийн алдагдлыг бууруулах, гадаад валютын нөөцийг хамгаалахад чиглэсэн мөнгөний хатуу бодлого болон төсвийн хэмнэлтийн бодлогыг хэрэгжүүлэхийг зорьж байна.

Иймд Засгийн газар ирэх 2023 оны төсвийн бодлогыг төрийн хэмнэлтийг хэрэгжүүлж,  “Шинэ сэргэлтийн бодлого”-ыг дэмжих, импортын дарамтыг сааруулах, нөөцийн оновчтой хуваарилалтаар дамжуулан макро эдийн засгийг тогтворжуулахад чиглэсэн дараах зорилтуудад чиглүүлж буй. Үүнд:

Нэгт, Төрийн хэмнэлтийн тухай хууль тогтоомжийг хэрэгжүүлэх; 

Хоёрт,  Эрүүл мэнд, боловсролын салбарт эхлүүлсэн төрийн үйлчилгээний чанар, гүйцэтгэл, хүрэх үр дүнд чиглэсэн төсвийн санхүүжилтийн тогтолцооны шинэчлэлийг эрчимжүүлж, уг шинэчлэлийг бусад салбарт нэвтрүүлэх. Төрийн албаны цалин хөлсний тогтолцоог бүтээмжтэй нь уялдуулж шинэчлэх; 

Гуравт, Өрийн удирдлагын стратегийг оновчтой хэрэгжүүлэх;

 Дөрөвт, Халамжаас хөдөлмөрт шилжих бодлогын хүрээнд нийгмийн хамгааллыг зорилтот бүлгүүдэд чиглүүлэх; 

Тавд, Хот хөдөөгийн хөгжлийн тэнцвэрт байдлыг хангаж төвлөрлийг сааруулах, авто замын түгжрэлийг бууруулах, орон нутагт хөрөнгө оруулалт, ажлын байр, бизнес эрхлэлтийн таатай орчныг бүрдүүлэхэд чиглэсэн татварын бодлого хэрэгжүүлнэ гэж Сангийн сайд мэдэгдсэн. 

IPO хийхтэй холбоотой зардлыг 20 хувиар өсгөж, татвараас чөлөөлнө. Түүнчлэн сарын 3.7 сая төгрөгөөс дээш орлоготой есөн хувийн өрхөөс бусад 91 хувьд нь хүүхдийн 100 төгрөгийг үргэлжлүүлэн олгохоор төсөвт суулгасан. 

Түүнчлэн Хэмнэлтийн хуулийн хүрээнд ирэх оны төсөвт 1 их наяд төгрөг хэмнэнэ.

Ирэх оны аймгуудын төсвийг харвал

Баянхонгор, Хэнтий, Хөвсгөл, Өвөрхангайд хамгийн өндөр төсөв төсөвлөсөн бол Булган, Сүхбаатар, Говьсүмбэр аймагт хамгийн бага төсөв оногдохоор байна. 

• Архангай-17,6 тэрбум
• Баян-Өлгий-10,2 тэрбум
• Баянхонгор-20,2 тэрбум
• Булган-8.9 тэрбум
• Говь-Алтай-15,8 тэрбум
• Дундговь-14,2 тэрбум
• Завхан-17,8 тэрбум
• Өвөрхангай-19,4 тэрбум
• Сүхбаатар-8,5 тэрбум
• Төв-10,4 тэрбум
• Увс-17 тэрбум
• Ховд-11,1 тэрбум
• Хөвсгөл-22 тэрбум
• Хэнтий 21,5 тэрбум
• Говьсүмбэр-2,2 тэрбум