ТАНИЛЦ: Орон нутгийн иргэд гурван хувийн хүүтэй ипотекийн зээл авахад тавигдах шалгуурууд

Хөдөө, орон нутагт шилжин суурьшиж анх удаа орон сууц худалдаж авах иргэдийн ипотекийн зээлийн хүүгийн 6 хувийг хөнгөлж 3 хувь болгож, урьдчилгаа төлбөрийн 30 хувийн 60 хувийг төр батлан даах талаар өмнө нь мэдээлж байсан. 

Тэгвэл үүнд шаардагдах санхүүжилт нь ирэх оны төсөвт суусан эсэхийг Сангийн сайд Б.Жавхлангаас тодрууллаа. 

Тэрбээр  "Орон нутагт ипотекийн зээлийг хүүг  гурван хувь хүртэл буулгана. Зөрүүг нь татаас хэлбэрээр олгох бодлогын эх үүсвэр ирэх оны төсөвт суусан. Иргэн орон нутагт очоод, шилжилт хөдөлгөөнөө хийлгээд, тэндээ зээлээ төлөх хугацаанд ажиллах тогтвортой ажлын байртай болж энэ бүхнээ нотлох шаардлагатай. Ингэснээр төсвийн мөнгө гарна. Хэрэгжилт нь бодитой байх ёстой.

Түүнээс биш орон нутагт байр авсан хэрнээ буцаад яваад байж болохгүй. Тогтвортой ажилтай,  хүүхдүүд нь ерөнхий боловсролын сургууль, сургууль өмнөх боловсролын байгууллагад бүртгэлтэй, тогтсон ажилтай зэрэг олон зүйлийн гүйцэтгэлд нь  төрөөс хянаж оролцох ёстой. Төсвийн мөнгө болгон бодлогоо онох ёстой. Шаардагдах мөнгө нь төсөвт суусан учир бодитоор хэрэгжинэ" гэлээ.