С.Бямбацогт: Вагоны жолооч согтуу, хурд хэтрүүлсний улмаас осол гаргасан

Өнгөрөгч шөнө Дорноговь аймгийн Улаанбадрах суманд осол болсон. Зүүнбаян өртөөнөөс Ханги-Мандлын төмөр замын чиглэлд ачаа ачсан "Монголиан транс ложистик" компанийн вагон замаас гарч унасан осол болсон. 

Энэ талаар ЗТХ-ийн сайд мэдээлэл өглөө. Тэрбээр "Зүүнбаян өртөөнөөс 75 км зайтай Хулангийн Шанд гэх зөрлөгт уг осол гарсан. Өнгөрсөн шөнө 23:30 цагийн орчимд хөдөлж, 00:20 цагийн орчимд уг осол гарсан. Нийтдээ цуваанд 17 вагон явж байсан. 14 нь төмөр замын ресс төмөр, гурав нь төмөр замын бетон дэр ачсан байна лээ. Ханги-Мандлын төмөр замын бүтээн байгуулалтад ашиглах ачаа байсан.

Ачсан ачаатай вагон замаас гарч унасан. Вагонд гурван хүн зорчиж байсан. Биеийн байдал одоогоор гайгүй байна. Хүний амь нас эрсдээгүй. Ослын шалтгааныг газар дээр нь тодруулсан.

 Урьдчилсан байдлаар вагон хурд хэтрүүлсний улмаас замаас гарсан байх гэсэн дүгнэлт гарсан. Мөн вагоны машинист нь согтуу байсан гэсэн мэдээлэл ирж байна. Холбогдох байгууллагууд ажиллаж байна. 

Төмөр замын салбарыг удирдлага зохион байгуулалтаар хангах шаардлага байна. Маш замбараагүй явж  ирсэн. Төмөр замын бодлого зохицуулалт алдагдсан, мөн хариуцлагын тогтолцоо алдагдсан. Дээрх осол гэхэд хариуцлагагүй машинистын буруугаас болсон гэж үзэж байна. 

Хатуу дүрэм энэ салбарт үйлчлэх ёстой, цаашид сахилга дэг журмыг тогтоох тал дээр яамны зүгээс бодлого боловсруулна. Төмөр замын тухай хуулийг яаралтай баталж замбараагүй төмөр замуудыг цэгцэлж тусгай агентлаг байгуулах шаардлага үүссэн" гэлээ.