ЦЕГ: Монгол залуугийн биед халдсан ОХУ-ын иргэнийг цагдан хорьсон

Өнгөрөгч есдүгээр сарын 24-нөөс 25-нд шилжих шөнө ОХУ-аас орж ирсэн гурван иргэн архидан согтуурч улмаар нэг нь  Монгол Улсын иргэн Г-гийн толгойг алхаар балбан зодож маш хүнд гэмтээсэн хэрэг гарсан. Иргэн Г одоо Гэмтэл согог судлалын үндэсний төвд биеийн байдал нь маш хүнд байдалтай байгааг түүний ар гэрээс бидэнд хандаж ярилцлага өгсөн юм. 

Монгол залууг зодож гэмтээсэн гэх ОХУ-ын иргэн “Д”-г хорих 461-р ангид саатуулсан талаар ЦЕГ-аас мэдээллээ. Олон нийтийн цахим сүлжээгээр гэмт хэрэг үйлдсэн гэх ОХУ-ын иргэн “Д”-д эрүүгийн хэрэг үүсгэхэд ОХУ-ын элчин сайдаас зөвшөөрөл авна гэх мэдээлэл цацагдсан. Харин уг мэдээллийг ЦЕГ-аас үгүйсгэсэн бөгөөд уг хэргийг БГД-ийн Цагдаагийн газарт шалгах ажиллагаа үргэлжилж байгаа аж.

Тус хэргийг үйлдсэн этгээд нь дипломат албанд ажилладаггүй учир ОХУ-ын ЭСЯ-аас зөвшөөрөл хүсэж шалгахгүй, Монгол Улсын нутаг дэвсгэрт үйлдэгдсэн учир манай улсын хуулийн хүрээнд хэргийг шалгана гэлээ.