ГХ-ны дэд сайд Б.Мөнхжин Веьтнам улс руу визгүй зорчих санал тавилаа

        -Манай сэтгүүлч  Бүгд Найрамдах Социалист Вьетнам улсаас мэдээлж байна-

Монгол Улсын Гадаад харилцааны дэд сайд Б.Мөнхжин Бүгд Найрамдах Социалист Вьетнам улсад айлчлал хийж байна. Айлчлалын эхний өдөр тэрбээр Вьетнам улсын Гадаад хэргийн сайд Бүй Тхань Сөн-д бараалхалаа.  Мөн Вьетнамын талаас тус улсын Гадаад хэргийн тэргүүн дэд сайд Нгүен Минь Вүтэй улс төрийн зөвлөлдөх уулзалт хийлээ. Уулзалтын үеэр дэд сайд Б.Мөнхжин тус улсын бүх салбарт хамтын ажиллагаагаа өргөжүүлж, хоёр орны харилцааны түвшинг ахиулах, мөнгө угаах, терроризмын эсрэг хэрхэн тэмцэх талаар туршлага солилцох зэрэг зургаан асуудлыг хөндсөн юм. 

Мөн хоёр улсын иргэд визгүй зорчих боломжуудыг ярилцсанаас гадна шууд нислэгийн тоог нэмэх саналыг манай талаас гаргав.

Энэ тухай Монгол Улсын Гадаад харилцааны дэд сайд Б.Мөнхжин  "Монгол паспортын хүчин чадлыг нэмэгдүүлэх зорилгын хүрээнд урт хугацаандаа хоёр улсын хооронд харилцан визгүй зорчих саналыг тавилаа.  Айлын талын хариуцсан байгууллага болох Дотоод хэргийн яамтайгаа зөвлөлдөх асуудал байгааг уулзалтын үеэр хэлсэн. Монгол Улсын иргэд аль болох олон улс руу визгүй зорчдог байх зорилтыг хангахыг чухалчилж байгаа" гэв.

Монгол Улс, Бүгд Найрамдах Социалист Вьетнам улс дипломат харилцаа тогтоосны 70 жилийн ой ирэх жил болно. Энэ хүрээнд Монгол Улсын Ерөнхийлөгчийг тус улсад айлчлах саналыг тавьжээ.

 Гадаад харилцааны дэд сайд Б.Мөнхжин Бүгд Найрамдах Социалист Вьетнам  улстай хөгжүүлж буй харилцаандаа чухал ач холбогдол өгдөг болохыг онцолж Монгол, Вьетнамын уламжлалт найрсаг харилцаа, хамтын ажиллагааг эдийн засгийн бодит агуулгаар баяжуулж, худалдаа, хөрөнгө оруулалт болон бусад бүхий л салбарт өргөжүүлэхийн чухлыг тэмдэглэв. Мөн тус улсын боомтуудаар Монголоос уул уурхайн гаралтай түүхий эд бүтээгдэхүүн тээвэрлэх болон манай улс импортын бараагаа дамжуулах боломж бий эсэх талаар салбарын сайд нар зөвлөлдөх уулзалт хийхээр тохирлоо.

Монгол Улс Вьетнам Улстай хөгжүүлж буй харилцаандаа чухал ач холбогдол өгсөөр ирсэн. Хоёр улс хүнс, хөдөө аж ахуй, аялал жуулчлал, хөдөлмөр эрхлэлтийн салбарт хамтын ажиллагаагаа идэвхжүүлэх өргөн боломж бий. Ялангуяа хөдөө аж ахуйн бүтээгдэхүүн, түүхий эд боловсруулах, худалдааны эргэлтийг нэмэгдүүлэх, аялал жуулчлалыг хөгжүүлэх чиглэлд амжилттай хамтран ажиллах боломжтой юм.

Өнгөрсөн онд Монгол Вьетнамын худалдааны эргэлт  80,2 сая ам.доллар байсан бөгөөд экспорт 484 мянган ам.доллар, импорт 79,7 сая   ам.долларт  хүрчээ. Энэ нь 2020 оны мөн үетэй харьцуулахад 27,3 хувиар өссөн үзүүлэлт юм. Вьетнам улстай хийж буй худалдаа Монгол Улсын нийт худалдааны эргэлтийн 0.49 хувьтай тэнцэж байна.