Монголын нотариатчдын танхим: Сайн, муу нэртэй ч гэсэн нотариатыг халах боломжгүй

Өнөөдрөөс эхлэн иргэний үнэмлэх, жолооны үнэмлэх, төрсний гэрчилгээ, гэрлэлтийн гэрчилгээ, нас барсны гэрчилгээ, иргэний оршин суугаа хаягийн бүртгэлийн тодорхойлолт, нийгмийн даатгалын шимтгэл төлөлт зэрэг 74 тооны тодорхойлолтыг энэ цагаас хойш заавал нотариатаар батлуулахыг шаардахгүй боллоо. 

Энэ хүрээнд Цахим хөгжил, харилцаа холбооны яам Монголын нотариатчдын танхим ТББ-тай  санамж бичиг байгууллаа. Энэ үеэр тус ТББ-ын Ерөнхийлөгч Ч.Баянжаргалаас тодруулга авлаа. Тэрбээр "Төрийн байгууллага өөрөө тухайн иргэнээс нотариат шаарддаг, үүнд иргэн 500 төгрөг төлж нотариатаар гэрчлүүлдэг учраас иргэдийн дунд шүүмжлэл гардаг. Дан ганц манай улс нотариатаар гэрчлүүлэхийг шаарддаггүй. Дэлхийн ихэнх улсад нотариатын үйлчилгээ бий. Төрийн гэрчлэх чиг үүргийг хэрэгжүүлдэг цорын ганц байгууллага нь нотариат.  Тиймээс нотариатыг халах боломжгүй, хэрэгцээ шаардлага нь байсаар байна. Шүүмжлэхээс илүүтэй иргэдэд хэрхэн хүртээмжтэй болгох тал дээр ажиллах шаардлага бол бий" гэлээ.