ЭМЯ: Сүүлийн 10 жилд тарваган тахал өвчнөөр 15 хүн өвчилж, долоон хүн нас барсан

ЭМЯ-наас тарваган тахлын өвчлөлийн нөхцөл байдлын талаар мэдээлэл хийж байна. 

Хамгийн сүүлд Ховд аймгийн  Мөст сумын Хужирт багийн Түймэр гэдэг газраас иргэн "С" нь 2022 оны 09 сарын 12-ны өдөр хавхаар тарвага агнаж, чанаж идсэний дараа халуурах, гүйлгэх шинж тэмдэг илэрч, аймгийн эрүүл мэндийн төвд хандсан байна.

ЭМЯ-ны Нийтийн эрүүл мэндийн газрын дарга Д.Баярбат өгсөн мэдээллээр  “ЗӨСҮТ-өөс гаргасан тарваган тахлын байгалийн голомтын аюулын зэрэглэлээр 15 аймгийн 78 суманд хүний өвчлөл гарах эрсдэл өндөр байна гэж дүгнэжээ.

Түүнчлэн  2012-2021 онд нийт зургаан аймгийн 21 суманд тарваган тахлын идэвхжил өндөр,голомт байгааг тогтоосон байдаг.  Мөн дээрх хугацаанд Ховд аймагт  долоо, Өвөрхангай аймгийн Сант суманд нэг, Баян-Өлгий аймгийн Ногоон нуур суманд хоёр, Завхан аймагт хоёр, Говь-Алтай аймгийн Төгрөг суманд нэг, Хөвсгөл аймгийн Мөрөн, Жаргалан суманд хоёр буюу нийт зургаан аймгийн 11 cуманд 15 хүн тарваган тахлаар өвчилж, долоон хүн нас барж байжээ.