Айлчлал: У.Хүрэлсүх, В.Путин, Ши Жиньпин нарын гурвалсан уулзалт болно

                           -Манай сэтгүүлч Н.Мижидмаа  Бүгд Найрамдах Узбекистан Улсаас мэдээлж байна-

Монгол Улсын Ерөнхийлөгч У.Хүрэлсүх Узбекистан Улсад ажиллаж байгаа билээ. Тэрбээр  ШХАБ-ын дээд хэмжээний уулзалтанд оролцоно. Манай улс 2004 оноос хойш ШХАБ-т ажиглагчийн статустайгаар оролцох ирсэн,  энэ удаад ч тус статусаа хадгалж оролцож буй. 

 Энэ үеэр  У.Хүрэлсүх, В.Путин, Ши Жиньпин нарын гурвалсан уулзалт болно. Уулзалт өнөөдөр  /2022.09.15/ орон нутгийн цагаар 16:30 цагт эхэлнэ.

Монгол Улсын Ерөнхийлөгчийн санаачилгаар Монгол Улс, ОХУ, БНХАУ-ын төрийн тэргүүн нарын

1. Анхдугаар уулзалт 2014 оны есдүгээр сарын 11-ний өдөр Тажикистаны Душанбе хотноо ШХАБ-ын гишүүн орнуудын төрийн тэргүүн нарын зөвлөлийн 14 дүгээр хуралдааны үеэр,
2. Хоёрдугаар уулзалт 2015 оны долдугаар сарын 9-ний өдөр ОХУ-ын Уфа хотноо,
3. Гуравдугаар уулзалт 2016 оны зургадугаар сарын 23-ны өдөр Узбекистаны Ташкент хотноо,
4. Дөрөвдүгээр уулзалт 2018 оны тавдугаар сарын 9-ний өдөр БНХАУ-ын Чиндао хотноо,
5. Тавдугаар уулзалт  2019 оны долдугаар сарын 14-ний өдөр Бишкек хотын “Ала-Арча” цогцолборын “Буруна” харшид болж байсан.

Тэгвэл энэ удаагийн гурвалсан уулзалтаар Монгол Улсын Ерөнхийлөгчийн Эдийн засгийн коридор байгуулах хөтөлбөр буюу

1. Монголын нутаг дэвсгэрээр дамжуулж ОХУ-аас БНХАУ-д байгалийн хий нийлүүлэх хоолойн төсөл

2. Ази, Европыг холбосон төмөр зам, авто замын сүлжээг бий болгох асуудлыг Монгол Улсын талаас хөндөх юм.

2016 оны зургадугаар сарын 23-ны өдөр Ташкент хотноо болсон Монгол Улс, ОХУ, БНХАУ-ын төрийн тэргүүн нарын уулзалтын үеэр “Монгол-Орос-Хятадын эдийн засгийн коридор байгуулах хөтөлбөр”-т гарын үсэг зурсан.

Хөтөлбөрийн зорилго нь Монгол Улс, ОХУ, БНХАУ-ын хооронд худалдааны эргэлтийг нэмэгдүүлэх, бараа бүтээгдэхүүнийг өрсөлдөх чадвараар хангах, хил дамнасан тээврийг хөнгөвчлөх, дэд бүтцийг хөгжүүлэхэд чиглэсэн хамтарсан төслүүдийг хэрэгжүүлэх замаар гурван талт хамтын ажиллагааг өргөжүүлэн хөгжүүлэхэд орших юм.