Э.Цэндбаатар, З.Шинэчагтгын 600 саяын бооцоотой тулаан өнөөдөр болно

 Монголд анх удаа зохион байгуулагдаж буй  600 сая төгрөгийн бооцоотой мэргэжлийн боксын тулаан өнөөдөр /2022.09.09/ болно.  Тулаанд МУГТ Э.Цэндбаатар, холимог тулаанч З.Шинэчагтга  нар оролцож, хэн нь илүүгээ харуулна. 

Тулаан өнөө орой 19.00 цагаас Монгол Бөхийн өргөөнд болох бөгөөд тасалбарыг 60.000 төгрөг, 70.000 төгрөг, 80.000 төгрөг, 200.000 төгрөг, 300.000 төгрөгөөр худалдаалагдаж буй. Монголд анх удаа өндөр бооцоотой тулааныг хийж байгаа тэд бооцооны мөнгөө хоёр талаасаа спонсороосоо гаргажээ. 

МУГТ Э.Цэндбаатар:

Тулаанд хэн сайн бэлтгэлтэй, хэн нь илүү толгойгоо ажиллуулсан нь хожно. Ялахын тулд бүх хүчээ дайчилна, маш том нэр хүнд явж байгаа.  Шүүлт шударга болно, хэнийхэн ч талд үйлчлэхгүй шүүнэ гэж найдаж байна. Шударга өрсөлдөөн болно. Хэрэв би хожигдвол Монголын боксын холбоо болон үе үеийн боксчдыг доромжлохтой адилхан.  Бүтэн тоглохыг хүсэхгүй байгаа учраас хамаг хүчээ гаргана.  Би ямар амьдралд байснаа үргэлж мэддэг би олон ч зүйлийг давж тууллаа. Надад бодсон зүйл байна. Тодорхой хэмжээний хандив, аян хийнэ гэж төлөвлөсөн. Би хэрэв хожигдлоо гэхэд миний карьерт нөлөөлөхгүй.  Намайг мэргэжлийн боксын том ертөнц хүлээж байна" гэв.

Холимог тулаанч З.Шинэчагтга 

"Бэлтгэл маш сайн хангагдсан.Ачаалал хамгийн их даах чадвар дээрээ байна. Жингээ тэглээд орж ирнэ. Хэрэв жин илүү байвал жингээсээ хасагдана гэсэн үг. Бооцооны мөнгөө сайн үйлд зориулна гэж би өөрөө санаачилга гаргасан. Өрсөлдөгч маань бас хандивын аянд зориулна гэж хэлсэн байна лээ. Миний хувьд бодитой сайн үйлсийн аянд зориулна" хэмээсэн.