МУГТ Э.Цэндбаатар: Би олон ч зүйлийг давж тууллаа, ялахын тулд бүх хүчээ дайчилна

МУГТ Э.Цэндбаатар, холимог тулаанч З.Шинэчагтга  нарын Монголд анх удаа 600 сая төгрөгийн бооцоотой мэргэжлийн боксын тулаан маргааш болно.  

Өнөөдөр тэд Бөхийн өргөөнд жингээ үзлээ. Энэ үеэр МУГТ Э.Цэндбаатар дараах мэдээллийг өглөө. 

Тэрбээр "Миний бэлтгэл маш сайн хангагдсан, жиндээ хүрэхийн тулд жингээ нэмсэн. Мөн хүчний дасгал сайн хийсэн. Анх удаа жин маань 70 кг хүрлээ.Жин хасахаасаа нэмэх нь хэцүү юм байна. Өмнө нь дандаа жин  хасч 57 кг-д тулалддаг байсан. Тулаанаа тэсэн ядан хүлээж байна. Тулаанд хэн сайн бэлтгэлтэй, хэн нь илүү толгойгоо ажиллуулсан нь хожно. Ялахын тулд бүх хүчээ дайчилна, маш том нэр хүнд явж байгаа. Монголд анх удаа өндөр бооцоотой тулааны анхдагч нь болж байгаад баяртай байна. Дүү нар маань үүнээс  илүү бооцоотой тэмцээнийг нутагтаа хийж байна. Бооцооны мөнгөө хоёр талаасаа спонсороос гаргасан. Өндөр бооцоотой тулааныг маш зохион байгуулалттай хийнэ. Шүүлт шударга болно, хэнийхэн ч талд үйлчлэхгүй шүүнэ гэж найдаж байна. Шударга өрсөлдөөн болно. Хэрэв би хожигдвол Монголын боксын холбоо болон үе үеийн боксчдыг доромжлохтой адилхан. Энэ тулаанаар гал гарна, намайг цохиж унагаахыг нь харъя. Бүтэн тоглохыг хүсэхгүй учраас хамаг хүчээ гаргана. 

Би ямар амьдралд байснаа үргэлж мэддэг би олон ч зүйлийг давж тууллаа. Надад бодсон зүйл байна. Тодорхой хэмжээний хандив, аян хийнэ гэж төлөвлөсөн. Би хэрэв хожигдлоо гэхэд миний карьерт нөлөөлөхгүй.  Намайг мэргэжлийн боксын том ертөнц хүлээж байна" гэлээ.