“Монголд гарсан улс төрийн хэлмэгдүүлэлт: Дүгнэлт, сургамж” лекц зохион байгуулагдаж байна

Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хууль болон холбогдох бусад хууль, тогтоомжийн хүрээнд жил бүрийн 9 дүгээр сарын 10-ны өдрийг улс төрийн хэлмэгдэгсдийн дурсгалыг хүндэтгэх өдөр болгон тэмдэглэн өнгөрүүлдэг уламжлалтай бөгөөд өнөө жил 27 дахь удаагаа тэмдэглэн өнгөрүүлнэ. Монгол Улсын Их Хурал 1996 онд жил бүрийн 9 дүгээр сарын 10-ны өдрийг улс төрийн хилс хэрэгт хэлмэгдэгсдийн дурсгалыг хүндэтгэх өдөр болгон орон даяар хүндэтгэн өнгөрүүлж байхаар шийдвэрлэснээс хойш Цагаатгах ажлыг удирдан зохион байгуулах улсын комисс нь хэлмэгдэгчдийн дурсгалыг мөнхжүүлэх, түүхэн гашуун сургамж, хэлмэгдүүлэлтийн хор уршгийг ард иргэдэд таниулах, ахин давтахгүй байх чиглэлээр соён гэгээрүүлэх олон талт үйл ажиллагаа зохион байгуулж байна.

Улсын комиссын даргын 2022 оны 09 дүгээр захирамжийн дагуу батлагдсан “Улс төрийн хэлмэгдүүлэлтийн бусад үр дагаврыг арилгах буюу хэлмэгдэгчдийн нэр төрийг сэргээж, дурсгалыг мөнхжүүлэх, соён гэгээрүүлэх ажлыг эрчимжүүлэх төлөвлөгөө”-нд тусгагдсан хэлмэгдүүлэлтийн хор уршгийг нийтэд танин мэдүүлэх арга хэмжээний хүрээнд Цагаатгах ажлыг удирдан зохион байгуулах улсын комисс, ХААИС-тай хамтран тус сургуулийн оюутнуудад “Монголд гарсан улс төрийн хэлмэгдүүлэлт: дүгнэлт, сургамж” лекцийг өнөөдөр /2022.09.06/ зохион байгуулж байна.

Түүнчлэн уг лекц нь 2022 оны 09 дүгээр сарын 06-наас 09-ны өдрүүдэд 21 аймаг, нийслэлийн 9 дүүргийн ЕБС-иудын ахлах ангийн сурагчдад болон политехник коллеж, мэргэжил сургалт үйлдвэрлэлийн төвүүдийн суралцагсдад нэгэн зэрэг зохион байгуулагдах бөгөөд энэхүү лекцээр улс төрийн хэлмэгдүүлэлтийн хор уршиг, үр дагаврыг хүүхэд, залуучуудад түгээн таниулах, хэлмэгдэгчдийн нэр төрийг сэргээж, дурсгалыг мөнхжүүлэх, соён гэгээрүүлэх зорилготой юм.

МОНГОЛ УЛСЫН ЦАГААТГАХ АЖЛЫГ УДИРДАН ЗОХИОН БАЙГУУЛАХ УЛСЫН КОМИССЫН АЖЛЫН АЛБА