Д.Амарбаясгалан: Ерөнхий сайд бид хоёрт хичээл заасан багш, анги хамт олон бий, диплом бүртгэлтэй системээс үзэж болно

Олон нийтийн сүлжээнд Ерөнхий сайд Л.Оюун-Эрдэнэ, ЗГХЭГ-ын дарга Д.Амарбаясгалан нарыг "МУИС-ийн хуулийн ангид сурч төгсөөгүй" тухай мэдээлэл тархсан. Энэ талаар ЗГХЭГ-ын дарга Д.Амарбаясгалангаас тодруулахад тэрбээр "Бид хоёр төгссөн нь үнэн. Бидэнд хичээл заасан багш нар бий, анги хамт олон, диплом хамгаалсан сэдэв ч бий. БШУЯ-нд дипломын дугаар нь хүртэл бүртгэгдсэн байгаа шүү дээ. Ерөнхий сайд бид хоёр 2009 оны зургадугаар сарын 2-нд тухайн үеийн МАХН-ын Хэрэг эрхлэх газарт газрын дарга нараар томилогдож байсан. Нэг нь сэтгүүлч, нөгөө нь инженер мэргэжилтэй ийм хоёр хүн орж ирсэн. Бид хоёрт нэмэлтээр улс төрийн шинжлэх ухааны чиглэлээр суралцах зайлшгүй шаардлага гарсан учраас МУИС-д суралцсан. Энэ бол маш тодорхой. Биднийг дипломыг үзүүлэх гэхээсээ илүүтэй бүртгэлтэй системээс нь та бүхэн үзэж болно" гэлээ.