МУГБ Ч.Доржгочоо агсаны үр хүүхдүүд 1,5 тэрбум төгрөгөөр аавынхаа ажиллаж байсан сургуулийг иж бүрэн шинэчлэн засварлалаа

Монгол Улсын боловсролын салбарт өнөөдөр нэгэн шинэ түүх бичигдлээ. Нэрт сурган хүмүүжүүлэгч, зохиолч МУГБ Ч.Доржгочоо агсаны үр хүүхдүүд 2018 онд "Доржгочоо сан"-г үүсгэн байгуулж боловсрол, эрүүл мэндийн салбарт үнэтэй хувь нэмрээ оруулж ирсэн юм. Сангийн хүрээнд хийгдсэн ажлуудын нэг нь Төв аймгийн Зуунмод сумын 4 дүгээр сургуулийн барилгын ажлыг сангаараа дамжуулан буюу хувийн хөрөнгөөр нийт 1,5 тэрбум төгрөгөөр иж бүрэн шинэчлэн засварласан явдал байлаа. 

МУГБ Ч.Доржгочоо нь боловсролын салбарт 40 гаруй жил ажиллахдаа дөрвөн ерөнхий боловсролын сургуулийг улсын тэргүүний сургууль болгоход үнэтэй хувь нэмрээ оруулсан бөгөөд хүүхэд багачуудад зориулан олон арван зохиол бүтээлийг туурвиж, өнөөдрийг хүртэл олон мянган хүүхдийг зохиол бүтээлээрээ сурган хүмүүжүүлсээр байгаа гавьяатай юм. 

МУГБ Ч.Доржгочоогийн нэрэмжит Төв аймгийн Зуунмод сумын 4 дүгээр сургууль нь 500 гаруй сурагч, 46 багш ажилчидтайгаар 2022 оны хичээлийн жилийг ийнхүү будаг нь ханхалсан шинэ анги танхимтайгаар угтаж байна. Төв аймгийн ИТХ-аас уг сургуулийг МУГБ Ч.Доржгочоогийн нэрэмжит болгох тогтоол гарч, түүнчлэн энэ өдөр Доржгочоогийн Төмөртогоог Төв аймгийн хүндэт тэмдэгээр шагнасан юм.

Боловсролын салбарт үнэтэй хувь нэмрээ оруулж буй "Доржгочоо сан"-гийн хамт олонд монголын ирээдүй болсон олон мянган сурагчдын нэрийн өмнөөс талархал илэрхийлье.