Г.Занданшатар: Хот заримдаа 0 зогсолт хийж байна. Ж.Сүхбаатар сайд хотын даргатай хамтарч энэ асуудлыг шийдвэрлээрэй

УИХ-ын ээлжит бус чуулганаар шинэ сайд нар тангараг өргөж байна. Сайд нар тангараг өргөх үеэр УИХ-ын дарга Г.Занданшатар тэдэнд хандаж үг хэллээ. 

Тэрээр  "Монгол төрийн гүйцэтгэх дээд байгууллага Засгийн газрын гишүүнээр томилогдсон сайд нарт баяр хүргэж ажлын амжилт хүсье. Та бүхэн өргөсөн тангаргаа ёсчлон биелүүлж төр ард түмнийхээ эрх ашгийг дээдлэн ажиллахыг хүсье. Эрхэм сайд нар та бүгд хоёр жил гаруй чиглэл чиглэлийн яамдаар мэргэшсэн туршлагатай төрийн түшээд. Тиймээс ажилдаа шууд орж тулгамдсан асуудлаа шийдэж иргэд олон нийтийн хүссэн үр дүнд богино хугацаанд хүрнэ гэж итгэж байна. ЗГХЭГ-ын даргаар томилогдож байгаа Д.Амарбаясгалан та нам засгийн үйл хэргийг хэрэгжүүлэх, яамдуудын уялдаа холбоог сайжруулахад анхаарч ажиллах үүрэг хариуцлага хүлээгдэж байна. Улаанбаатар хот заримдаа тэг зогсолт хийж байна. Тиймээс төвлөрлийг сааруулж, түгжрэлийг бууруулахад нийслэлийн засаг даргатай хамтран ажиллаж бодит үр дүнд хүрнэ гэж Ж.Сүхбаатар танд итгэж байна. Б.Бат-эрдэнэ та парламентад 5 удаа сонгогдсон туршлагатай улс төрч. Тиймээс спорт, олимпизмын үйл ажиллагааг түгээн дэлгэрүүлж, спортоор дамжуулан Монгол улсын нэр хүндийг өндөрт өргөхөд томоохон үүрэг гүйцэтгэнэ гэж итгэж байна" гэлээ.