С.Эрдэнэ: Намын бүлгийг татан буулгаж, дөрвөн гишүүнийг хаслаа

АН-дарга С.Эрдэнэ УИХ-ын гишүүн Д.Ганбат нар намынхаа зарим гишүүнийг гишүүнчлэлээс хассан талаар өнөөдөр /2022.08.29/ Төрийн ордонд мэдээлэл хийлээ.

Энэ үеэр АН-ын дарга С.Эрдэнэ:

-Үндсэн хуулийг ноцтой зөрчиж, хуулийн бус аргаар өөрчилж, төрийн түрэмгийлэл боллоо. Үндсэн хуулийг олонх мөн хамгаалах ёстой байгууллага нь хамгаалахгүй юм бол бид тэмцэнэ. Үндсэн хуулийн нэмэлт, өөрчлөлтийг батлах явцад намын эсрэг буюу хувийн эрх ашгаар хандсан АН-аас нэр дэвшсэн УИХ-ын гишүүн  С.Одонтуяа, Ц.Туваан, О.Цогтгэрэл, Б.Бейсен дөрвөн гишүүнд хариуцлага тооцож найман жилийн хугацаагаар намын гишүүнчлэлээс хасах шийдвэрийг гаргасан. 

Холбогдох хууль, дүрэм журмын дагуу АН-ын бүлгээс гурван гишүүнийг хасч, найман гишүүн үлдсэн, одоо нэмэгдээд дөрвөн гишүүнийг хасч байна. Ж.Батсуурь гишүүнд оногдуулсан сахилгын шийтгэлийг хүчингүй болгож, бүрэн эрхийг сэргээж, таван гишүүнтэй үргэлжилнэ. Бүлэг байх гишүүдийн  хүрээгүй учраас УИХ дахь АН-ын бүлгийг татан буулгаж байна.  Зөвлөл байгуулж, даргаар нь УИХ-ын гишүүн Д.Ганбат ажиллана" гэлээ.