Б.Батцэцэг: Шинэ сэргэлтийн бодлогыг БНСУ-ын шинэ Засгийн газрын бодлоготой уялдуулна

Гадаад харилцааны сайд Б.Батцэцэг, БНСУ-ын Гадаад хэргийн сайд Пак Жин нар өнөөдөр /2022.08.29/албан ёсны хэлэлцээ хийлээ. Хэлэлцээний  талаар мэдээлэл хийлээ.

Гадаад харилцааны сайд Б.Батцэцэг "БНСУ-ын Гадаад хэргийн сайд Пак Жин наймдугаар сарын 28-30-ны өдрүүдэд Монгол улсад албан ёсны айлчлал хийж байна. Найман жилийн дараа хэрэгжиж байгаа гадаад хэргийн сайдын айлчлал хоёр улсын өнгөрсөн 30 жилийн харилцааг дүгнэн, ирэх 30 жилийн хамтын ажиллагааны хэтийн төлөвийг тодорхойлоход онцгой ач холбогдолтой юм. Хамтын ажиллагааг таван тулгуур чиглэлд өргөжүүлэн бэхжүүлэх талаар тохиролцсон. 

Монгол Улс, БНСУ нь ардчилал, хүний эрх, эрх чөлөө зах зээлийн эдийн засгийн нийтлэг үнэт зүйлстэй. 

 Монгол Улс, БНСУ-ын улс төрийн яриа хэлэлцээ эрчимжүүлж, гадаад бодлого, аюулгүй байдал, батлан хамгаалах асуудлаар стратегийн яриа хэлэлцээг эрчимжүүлэхэд санал нэгдлээ. Энэ хүрээнд хоёр улсын харилцааны хооронд хамтарсан хороо, ГХЯ хоорондын стратегийн зөвлөлдөх уулзалт зэрэг яриа хэлэлцээний механизмыг бэхжүүлж, энэ ондоо багтаан ээлжит уулзалтуудаа хийхээр тохирлоо. 

Монгол Улсын Алсын хараа-2050 урт хугацааны бодлого Шинэ сэргэлтийн бодлогыг БНСУ-ын шинэ Засгийн газрын бодлоготой уялдуулан тээвэр логистик, эрчим хүч, байгаль орчин, уул уурхай, дэд бүтэц, соёлын салбарт үр ашигтай хамтран ажиллах, бүтээн байгуулалтуудын томоохон төсөл хөтөлбөрүүдийг хамтран хэрэгжүүлэх талаар санал солилцлоо. 

Монгол Улсын шинэ нисэх буудлыг бүс нутгийн тээвэр логистикийн зангилаа болгох, Хөшигийн хөндийд шинэ хот эдийн засгийн чөлөөт бүс байгуулах хүрээнд БНСУ-ын Инчеоны чөлөөт бүс байгуулсан туршлагыг судлах ажлыг амжилттай эхлүүлснийг талууд сайшааж, энэ чиглэлд үргэлжлүүлэн хамтран ажиллахаар тохирлоо.

Хоёр улс харилцан ашигтай бие биеэ нөхсөн эдийн засгийн харилцааг Монгол Улсын байгалийн баялаг, БНСУ-ын туршлага, шинэ дэвшилтэт технологийг хослуулан хэрэгжүүлэх талаар ярилцаж, худалдаа, хөрөнгө оруулалтыг эрхзүйн орчинд бэхжүүлэх хүрээнд хоёр улсын хамтарсан судалгааны дүнд үндэслэн эдийн засгийн түншлэлийн хэлэлцээр байгуулах яриа хэлэлцээг эхлүүлэхээр тохиролцлоо. 

Нийт хөрөнгө оруулалтыг хөхүүлэн дэмжих, харилцан хамгаалах тухайд Засгийн газар хоорондын хэлэлцээрийг шинэчлэн эрчимжүүлэхээр боллоо. 

10 аймгийн төвд дулааны станц барих,  орон сууцны хороолол барих зэрэг томоохон төсөл хөтөлбөрийн гүйцэтгэлийг урагшлуулах талаар онцгойлон анхаарч ажиллахаар боллоо. Байгаль орчин, уур амьсгалын өөрчлөлт, аялал жуучлалын салбарт хамтын ажиллагааг эрчимжүүлэхээр боллоо. 

Монгол, Солонгосын иргэдийн солилцоог дэмжих хүрээнд соёл урлаг, боловсрол, эрүүл мэнд, хүүхэд залуучуудын хөгжилд, биеийн тамир, спорт, хүмүүнлэгийн салбарыг дэмжиж ажиллах талаар талууд ярилцлаа.

БНСУ-д оршин суугаа манай улсын иргэдийн эрх ашгийг хамгаалах болон хоёр улс харилцан адил байх зарчмын  дагуу иргэд зорчих таатай нөхцөлийг бүрдүүлэх, эмчилгээний зорилгоор зорчих монгол иргэдэд БНСУ-ын визийн нөхцөлийг хөнгөвчлөх талаар болон агаарын нислэгийн тоог нэмэгдүүлэх зэрэг ард иргэдийн солилцоог нэмэгдүүлэх талаар хамтарч ажиллахаар тохирсон" гэлээ.