Хотын удирдлагад харагддаггүй хоосон саарал хашаа өнгө дарж, төвөг болсоор...

Улсын хүн амын талаас илүү нь амьдарч байгаа нийслэл хот түгжрэлгүй, утаагүй, бухимдалгүй, иргэндээ ээлтэй болтол олон жилийг ардаа үдэх биз. Үе үеийн хотын дарга нараас өнгө үзэмж хамгийн их ярьж байгаа нь өнөөгийн удирдлага Д.Сумъяабазар гэхэд буруудахгүй. Хотын өнгө үзэмж, харагдах байдал, иргэдийн тав тух, ногоон байгууламж нэмэгдүүлэхэд хэд хэдэн дорвитой ажил хийж байгаа харагддаг.

Сүүлийн хоёр жилд зөвшөөрөлтэй зөвшөөрөлгүй гарааш буулгах ажлыг хот даяар эрчимжүүлэхээс гадна нийтийн эзэмшлийн зам талбайг чөлөөлж хашаа хайсуудыг буулгаж эхэлсэн.

Гэвч хотын төвд хогондоо дарагдсан хоосон саарал хашаа даан ч хотын удирдлагуудын нүдэнд харагдахгүй байгааг иргэд гайхаж байна. Чингэлтэй дүүргийн 5-р хорооны нутаг дэвсгэрт байрлалтай төв зам дагуу, явган хүний замтай тулгаад барьсан уг саарал хашаа олон жил хогондоо дарагдан байсаар л байх уу? Одоо сүүлдээ ойр хавийн тэнэмэл тодотголтой иргэдийн орж суудаг, унтдаг, архи уудаг газар нь болоод зогсохгүй зөрөн өнгөрөх иргэдийн байгалийн нойл болсон гэнэ.

Хотын төвдөө байгалийн нойлтой нийслэл хэзээ цэвэр цэмцгэр өнгө үзэмжтэй хот болох вэ? Олон жил болж байгаа энэ саарал хашааг эрх бүхий хүмүүс нь нүдээ нээж харахгүй бол энэ хавиар явган зорчих иргэдэд төвөг болж, ойр орчимдоо байрлах үйлчилгээний газруудын хаяг самбарыг хааж хотын өнгө үзэмжид сөргөөр нөлөөлж байна.