ЗТХЯ-ны Төрийн нарийн бичгийн дарга С.Батболдод эрүүгийн хэрэг үүсгэн, гэр болон оффист нэгжлэг хийжээ

Дуусдаггүй зовлон, дундардаггүй ажил болсон Дарханы зам олон хүний эрүүл мэнд, эд хөрөнгө, амь насыг хохироосоор олон жилийг ардаа үдлээ. Эцэс сүүлд нь Засгийн газар энэ их зовлонгийн эхлэл болсон Дарханы замын тендер сонгон шалгаруулалттай холбоотой хүмүүсийг нэг бүрчлэн шалга гэх чиглэлийг хуулийн байгууллагуудад өгсөн юм.

Авлигатай тэмцэх газраас Дарханы замын тендер сонгон шалгаруулалттай холбоотой асуудлаар Зам, тээврийн хөгжлийн яамны нэр бүхий албан тушаалтнуудыг шалгаж эхэлсэн талаар бид өмнө мэдээлсэн. ЗТХЯ болон холбогдох албан тушаалтнуудын орон байр зэрэг нийт 30 гаруй объектод нэгжлэг хийгээд байгаа юм.

Тэгвэл тус яамны Төрийн нарийн бичгийн дарга С.Батболдод эрүүгийн хэрэг үүсгэжээ. Улмаар түүний гэр болон оффисын өрөөнд нь нэгжлэг хийж шалгалтын ажлыг үргэлжлүүлж байгааг эх сурвалж мэдээллээ.