П.Сайнзориг: Бөхчүүдийн допингийн шинжилгээний хариуг задалж үзээгүй

Энэ жилийн улсын баяр наадамд дөрөв, түүнээс дээш давсан бөхөөс допингийн шинжилгээ авсан. Тодруулбал, Энэ жил нийтдээ  дөрөв давсан 64 бөх болон үндэсний сурын харвааны эрэгтэй болон эмэгтэй тус бүр эхний найман байр гээд 16 харваачийн нийт 80 сорьцыг БНСУ-ын итгэмжлэгдсэн лаборатори руу илгээсэн. 

"Өнөөдрийн байдлаар 77 сорьцын хариу ирсэн. Хариунууд бүрэн ирсний дараа олон нийтэд мэдээлнэ" гэдгийг  Бөхийн салбар хорооны дарга, ХЗДХЯ-ны Төрийн нарийн бичгийн дарга П.Сайнзориг хэллээ. 

Мөн тэрбээр "Энэ жилээс дөрөв болон түүнээс дээш давсан бөх, сурын шөвгөрсөн бөхчүүд буюу нийт 80 бөхөөс допингийн шинжилгээ авсан. Нийт 80 хүний 16 нь харваач, 64 нь бөхчүүд. Допингийн шинжилгээг цагдаа болон тагнуулын байгууллагын хяналт оролцоотойгоор допингийн эсрэг үндэсний хорооны ажилчид авсан. Үүнийг хамгаалалтайгаар Солонгос улсын итгэмжлэгдсэн лабораторид илгээсэн.

Гадуур тодорхой  бөхчүүд допинг хэрэглэсэн байна гэсэн ташаа мэдээллүүд явж байна. Одоогоор хэн нэгэн этгээд допинг хэрэглэсэн, хэрэглээгүй гэдэг асуудал дээр хариулт хэлэх болоогүй. 77 хариу ирсэн, гурван хариу ирээгүй байна. Хариулт нь бүрэн ирэхээр зохих журмын дагуу олон  нийтэд мэдээлэх болно. Шинжилгээг бид хийдэггүй тул шинжилгээ хийдэг байгууллагаас хариу ирэхээр ил болгоно. Допингийн эсрэг үндэсний төвд хариу ирэхээр хамтран мэдээлнэ" гэв.