​Д.Сумъяабазар: Усан паркийн асуудал хууль зөрчөөгүй, улстөржүүлж байгаа

Энхтайваны гүүрний зүүн талд, Дунд гол урсдаг хэсгийн 11.8 га газарт “Азид хамгийн томд тооцогдох усан парк, спорт цогцолбор соёл амралтын хүрээлэн” баригдана гэсэн хэдий ч  25 давхар орон сууцны хороолол барих ажил эхэлсэн нь олон нийтийн эсэргүүцэлтэй тулгараад байгаа билээ. 

Үүнтэй холбоотой гомдлууд 11-11 утсанд ихээр ирсэн байна. Усан паркын газрын талаар Ерөнхий сайд хотын удирдлагуудтай уулзах үеэрээ тодрууллаа. 

Үүнд Улаанбаатар хотын захирагч Д.Сумъяабазар "Эхний зориулалт нь 2008 онд орон сууцаар гарсан. Тэрийг нь хүчингүй болгож хаяад, дахиж шүүхдэлцээд дахин усан паркаар гарсан. Тэгээд дахиж шүүхдээд сэргэхээр нь орон сууц, усан парк, тусгай зориулалтын гэсэн гурван чиглэлтэй гарсан. Тэгэхээр хууль зөрчөөгүй гэсэн үг. Улстөржүүлээд байгаа" гэсэн хариултыг өгчээ. 

Сануулахад, уг асуудлын дагуу Туул голын сав газрын захиргаанаас 2022 оны долдугаар дугаар сарын 01-ний өдрийн 01/424 дугаар албан бичгээр ирүүлсэн бөгөөд 2022 оны 07 дугаар сарын 06-ны өдөр хүлээн авч, холбогдох мөрдөн шалгах ажиллагааг явуулаад Эрүүгийн хуулийн тусгай ангийн 22.1 дүгээр зүйлийн 1 дэх хэсэгт заасан гэмт хэргийн шинжтэй үндэслэлээр 2021 оны 07 дугаар сарын 25-ны өдөр хэрэг бүртгэлтийн хэрэг нээж АТГ-аас шалгаж эхэлсэн.