Энэ намраас буруу талдаа жолооны хүрдтэй тээврийн хэрэгслийг хориглох эсэхийг эцэслэн шийдвэрлэнэ

Нийслэлээс өнгөрсөн хавар авто замын түгжрэлийг бууруулах чиглэлээр авч хэрэгжүүлэх шаардлагатай арга хэмжээний тухай санал асуулгыг иргэдээс авсан билээ. Уг санал асуулгад буруу талдаа жолооны хүрдтэй тээврийн хэрэгслийн хөдөлгөөнийг хугацаа тогтоож хориглох тухай асуухад иргэдийн 50.8 хувь нь дэмжээгүй байдаг. 

Тэгвэл дээрх асуудлыг энэ сарын сүүлээр  НИТХ-аар хэлэлцэж тодорхой шийдвэрийг гаргахаар болжээ. 

Тухайн үед буруу талдаа жолооны хүрдтэй тээврийн хэрэгслийн хөдөлгөөнийг хугацаа тогтоож хориглох асуудал яригдахад иргэд олон нийтийн зүгээс нэлээд эсэргүүцэлтэй тулгарсан учир нийслэлээс асуудлыг түр хойшлуулсан. 

Тэгвэл энэ намар түгжрэлийн эсрэг зоригтой шийдвэр гаргаж ажиллахыг Ерөнхий сайд Л.Оюун-Эрдэнэ  өчигдөр хотын удирдлагуудад ч сануулсан.

Импортоор орж ирж байгаа буруу рультэй тээврийн хэрэгслийг 2022 оны наймдугаар сараас уу эсвэл 2023 оны нэгдүгээр сараас хориглох уу гэдгийг НИТХ-аар эцэслэнэ.

Хотын дарга Д.Сумъяабазарын хувьд уг асуудалд хатуу байр суурьтай байгаа бөгөөд "Шийдэмгий, хатуу шийдвэрүүд гаргах цаг болсон" гэдгийг тэрбээр мэдэгдэж байсан удаатай.

Судалгаагаар зөвхөн  нийслэлд нэг жилд 80 мянган тээврийн хэрэгсэл нэмэгддэг,  тэдгээрийн дийлэнх нь стандартын шаардлага хангахгүй, эвдэрхий, өмнө нь аваар осолд орж байсан, үйлдвэрлэгдэхээ больсон автомашинууд орж ирдэг нь тогтоогджээ.