Төрхүүг Нөмрөгийн Дархан цаазат газарт нь эргүүлэн тавилаа

Энэ хавар ой хээрийн түймрийн үеэр эхээсээ төөрч хоцорсон нялх бамбаруушыг тус хамгаалалтын захиргааны байгаль хамгаалагчид 04 дүгээр сарын 28-ний өдөр олж амьтны тухай хуулийн дагуу авран хамгаалах үйл ажиллагааг хэрэгжүүлж Төрхүү гэдэг нэрийг хайрлаж, асарч тэнхэрүүлсэн билээ. Төрхүү биеэ авч явахаар хангалттай өсч бойжиж тэнхэрсэн, анх ирснээ бодвол 2-3 дахин томорсон тул яг 101 дэх хоног дээр нь буюу 2022 оны 08 дугаар сарын 06-ны өглөө эх байгальд нь эргүүлэн тавьсан байна. 

"Торны тагийг татаж онгойлгоход шууд л гарч голын шугуй руу хар хурдаараа хэд харайгаад эрчээрээ уулын уруу хэд өнхөрч босоод зугтаж одлоо. Тухайн газарт ажиглалт хийхэд 8 цагийн дараа баруун урдуур жалга даган уул өгсөж яваа харагдсан байна. Бодвол хоолондоо залгасан бололтой. Мөн жижиг толгой давж уруудан ус цүл, цал хийлгэн дүйгүйхэн гатлаад хоолой дагаж Нөмрөгийн голыг чиглэснээр Төрхүүгийн бараа тасарлаа" хэмээн Төрхүүг байгальд тавьсан хүмүүс бичиж тэмдэглэжээ. 
Төрхүүг бойжуулах, өсгөх үйлсэд хувь нэмэрээ оруулж хандивын аянд нэгдсэн нутгийн иргэд, аялагч, хамтын ажиллагаатай төрийн болон хувийн хэвшлийн байгууллагууд, зааж зөвлөж дэмжиж байсан байгаль орчны судалгааны байгууллагууд, эрдэмтэн, мэргэддээ баярласанаа тус газрын албаны хүмүүс илэрхийллээ.