Дарга нарын зугааг бэлдэх “Саамын гэрт” хуваарилагдсан цэрэг усанд живэх үед харгалзах офицер байгаагүй

Энэ сарын 5-ны өдөр Дорнод аймагт байрлалтай Зэвсэгт хүчний 327-р ангийн цэрэг 21 настай Х голын усанд живж харамсалтайгаар амиа алдсан. Малчин айлын ганц хүү болох талийгаач Х хоёрхон сарын дараа халагдаж хоног тоолон хүлээх эцэг, эхтэйгээ уулзах байсан ч ардын армийн хашаанаас амьд гарч чадаагүй.

Талийгаач цэрэг 327-р ангиас 10 гаруй км зайтай Хэрлэн голын хөвөөнд байрлах тус ангийн Саамын гэрт адуу манадаг байсан. Цэргийнхний өөрсдийн хэлж байгаа нэршлээр Саамын гэр гэх тэр газарт армид алба хаахаар очсон ардын хүүхдүүд ажиллаж дарга нарын зугааг бэлдэж байна.

Тансаг зэрэглэлийн ундаа болсон гүүний айраг, саамыг армид ардын хүү уухгүй нь мэдээж. Ангийн захирагч, дарга удирдлагуудын дайллага цайллагад голчлон хэрэглэдэг. Зэвсэгт хүчний 327-р ангийн цэргүүд сар орчмын хугацаанд ээлж ээлжээр саамын гэртээ адуугаа манадаг. 2-4 цэрэг манаанд гарахдаа өдөрт ээлжээр идэх хоолоо ч өөрсдөө бэлддэг байна. Тэгвэл эх сурвалжийн хэлж байгаагаар тэднийг харгалзах офицер байх ёстой байсан ч цэрэг живэх үед офицер байгаагүй. Ангийн зүгээс орлох хүнийг томилоогүй. Нас барсан байлдагчтай ойролцоо насны ахлагчид ажлаа даалгаад явсан байсан гэж мэдээллээ.