Ардын хүүгийн амиар халаасаа зузаалж байгаа “Цэргийн ангийн захирагч” нарыг нэгдсэн байдлаар шалгах ёстой

Одоогоос хэдхэн жилийн өмнө “цэргийн дэг” гэдэг зүйл армид алба хаахаар явсан аавын хүүгийн амийг тасалдаг байсан. Харин орчин цагт цэргийн дэг зүсээ хувиргаж цэвэр хөдөлмөрийн мөлжлөгөөс болж армид явсан залуус цогцос болоод дуусч байна. Ардын хүүг ангийн захирагч, штабын дарга нар нь ажилд зарснаас үүдээд  амиа алдах тохиолдол цөөнгүй гардаг боллоо.

Цэрэг өндрөөс унасан, хадлан дээр өвсний машинд дайруулсан, ногооны талбайд ажиллаж байхдаа биеийн байдал нь муудаж улмаар нас барсан гээд энх цагт эх орны хөвгүүд армид очиж боол мэт зарагдсаар амиа өгөх тохиолдлууд гарсаар байна. Хамгийн харамсалтай нь цэргүүдийг дур зоргоороо зарж, хөдөлмөрийн хөлсийг нь хувьдаа завшдаг ангийн захирагч нарыг ЗХЖШ-нэгдсэн байдлаар шалгалт хийж хариуцлага тооцож чадахгүй явсаар өнөөдрийг хүрсэн.

Цэргүүдээр ажил хийлгэдэг энэ байдлыг ч Монголын нийгэм байдаг л үзэгдэл мэтээр хүлээж авдаг болсон нь энх цагт эр цэргүүд армийн хашаанаас цогцос болон гарах гол шалтгаан болсоор байна.