ТУУЛ ГОЛЫН ДАГУУ ЗАВЬТ ЭРГҮҮЛ АЖИЛЛАЖ ЭХЭЛЛЭЭ

Урин дулаан цагт иргэд гол ус бараадан амралт зугаалга хийхдээ анхааралблолгоомжгүйгээс болж усанд осолдох явдал их гардаг. Энэ жилийн тухайд бороо хур багатай өдөртөө их халж байгаа учраас иргэд Туул голын орчим ихээр амрах хандлагатай байна. Тиймээс нийслэлийн Онцгой байдлын газраас цагдаагийн байгууллагатай хамтарсан уламжлалт "Завьт эргүүл" арга хэмжээг зохион байгуулж эхэллээ. 2010 оноос хойш дээрх байгууллагууд хамтран "Завьт эргүүл" хийж байгаа юм. Үүний үр дүнд усны ослын дуудлагын тоо өмнөх жилд 80 хувиар , усанд осолдсон хүний тоо ч тодорхой хувиар буурсан эерэг үр дүн, үзүүлэлттэй байна. Ихэвчлэн эцэг эхийн хараа хаялтгүйгээс бага насны хүүхдүүд мөн архи согтууруулах ундаа хэтрүүлэн хэрэглэсэн иргэн усанд осолдох нь элбэг байдаг тул ард иргэдийг сонор сэрэмжтэй байхыг нийслэлийн онцгой байдлын газраас анхааруулж байна.