Б.Бат-эрдэнэ: “Бүрдэл Майнинг”ХХК хулгайгаар ч болтугай ажиллая гэдэг сэтгэхүйгээ боль

Алтны үнэд хүрэхгүй амь нас байдгийг тод томруунаар харуулж байсан “Эко Алтан заамар ХХК” зүсээ хувирган “Бүрдэл Майнинг” ХХК болсон ч хуулийн дээгүүр гишгэлсэн хэвээр байгааг өнөөдөр БОАЖ-ын сайд Б.Бат-эрдэнэ онцолжээ.

Эргэн сануулахад 2019 оны намар Төв аймгийн Заамар суманд “Эко алтан заамар” компанийн талбайд ажлаа хийж байсан дөрвөн хүн нурангид дарагдаж амь насаа алдсан харамсалтай хэрэг гарч байсан. Үүнээс гадна Булган аймгийн Бүрэгхангай суманд үйл ажиллагаа явуулж байх үед ч мөн“Эко алтан заамар” компанийн талбайд осол гарч нэг хүний амь нас хохирсон асуудал гарсан ч нам дарагдаад өнгөрч байсан түүх бий.

Угаавч уг нь хар гэдэг шиг тус компани нэрээ өөрчлөн Бүрдэл Майнинг болсон ч өнөөдөр Туул голын амийг тасдах үйл ажиллагаа явуулсаар л байна. БОАЖ-ын сайд Б.Бат-эрдэнэ өөрийн цахим хуудсандаа:

Зөрчлөө арилгаад ажиллах тухай боддоггүй хулгайгаар ч болтугай ажиллая гэдэг сэтгэхүйгээ боль! гэжээ.

“БҮРДЭЛ МАЙНИНГ” ХХК-ИЙН УС АШИГЛАХ ЗӨВШӨӨРЛИЙГ ЦУЦАЛСАН ШИЙДВЭРИЙН БИЕЛЭЛТЭД ХЯНАЛТ ТАВИН АЖИЛЛАЛАА.

Туул голын сав газрын захиргааны даргын 2022 оны 06 дугаар сарын 30-ны өдрийн А/48 дугаар тушаалаар ус ашиглах эрхийг цуцалсан.

“Бүрдэл майнинг” ХХК-ны үйл ажиллагаанд 2022 оны 07 дугаар сарын 26-ны өдөр хяналт тавин ажиллахад зөвшөөрөлгүйгээр ус ашиглаж, ашигт малтмал олборлох үйл ажиллагааг үргэлжүүлэн явуулж байсан тул Төв аймгийн Мэргэжлийн хяналтын газарт зөрчлийн материалыг шилжүүлэхээр шийдвэрлээ. Мэргэжлийн Хяналтын Ерөнхий Газар онцгойлон анхаарна уу!!

Түүнчлэн “Бүрдэл майнинг” ХХК нь хаягдал хогийн цэгийг тусгаарлаагүй буюу хуучин ашиглаж байсан гэх жорлонгийн нүхэнд ил задгай хаясан, ус ашиглалтын тайланг гаргаагүй, хаягдал ус зайлуулах дүгнэлт, зөвшөөрөлгүй үйл ажиллагаа явуулсан, ус бохирдуулсны төлбөр төлөөгүй зэрэг зөрчил дутагдлууд илэрч байх тул илэрсэн зөрчилд болон төрийн захиргааны байгууллагаас гаргасан шийдвэрийг биелүүлээгүй зэрэг үйлдлүүдэд хариуцлага тооцуулахаар холбогдох хууль хяналтын байгууллагад хандан байнгын хяналт тавьж ажиллах болно гэжээ.