Талийгаач цэргийг амиа хорлоход хүргэсэн байж болзошгүй гэх үндэслэлээр Б.Баярчимэгийг шалгаж байна

Өмнөговь аймагт байрлах Зэвсэгт хүчний 167-р ангийн хугацаат цэргийн алба хаагч 19 настай Н нь 2022 оны долоодугаар сарын 13 нд барилгын хажуунаас нас барсан байдалтай олдсон талаар бид мэдээлсэн. Талийгаач Н-ыг наадмын өдөр буюу долоодугаар сарын 11-нд Хармагийн талбайд ажиллуулахаар нэгэн хувийн компани авч явсан байна. Ангиас ажил хийлгэхээр гаргахдаа ямар нэгэн зөвшөөрөлгүйгээр штабын дарга нь гаргасан гэж ар гэрийнхэн нь мэдэгдлээ. Гуравхан сарын дараа халагдахаар хүлээж байсан хүүгийнхээ цогцсыг ачаад явж байгаадаа гомдолтой байгаагаа хэлсэн.

Цэрэг амиа алдсантай холбоотойгоор ЦЕГ-аас цэргийн ангийн удирдлагуудад албан тушаалаа урвуулан ашигласан байж болзошгүй гэх үндэслэлээр шалгаж буй юм. Хариуцлага алдсан цэргийн ангийн удирдлагуудад хариуцлага тооцож, ажлаас нь чөлөөлсөн.

Уг асуудалд, амиа алдсан цэргийн найз охин О -гоос мэдүүлэг авсан талаар мэдээлсэн. Тэгвэл тэрбээр талийгаач цэрэгтэй  “Огт уулзаж байгаагүй, зөвхөн чатаар харилцдаг байсан” гэж мэдүүлжээ. Талийгаач цэргийг  амиа хорлоход хүргэсэн байж болзошгүй гэх үндэслэлээр “Галтууд” компанийн гүйцэтгэх захирал Б.Баярчимэгийг ЦЕГ-аас шалгаж байгаа аж.