О.Батбаяр: Бага насны хүүхэд, өндөр настнуудыг эмнэлэгт хэвтүүлэн эмчилнэ

Эрүүл мэндийн яамнаас цаг үеийн асуудлаар мэдээлэл хийлээ. Энэ үеэр Эрүүл мэндийн сайдын зөвлөх О.Батбаяр BA.1, BA.2 хувилбарын талаар мэдээлэл өгсөн юм. Тэрээр "Эл хувилбар дээр хоёр мутаци бүртгэгдсэн. Энэхүү мутаци нь эсэд бэхлэгдэх, эсэд нэвтрэх чадварыг эрс нэмэгдүүлсэн. Вакцинд хамрагдсан хүмүүст энэ тал дээр давуу тал бий. харин вакцинд хамрагдаагүй хүмүүст эрсдэл бий. Тиймээс хүүхэд, ахмад настнууд хүндрэх эрсдэлтэй тул түлхүү эмнэлэгт хэвтүүлэн эмчилнэ. Харин хөнгөн хэлбэрийн өвчлөлтэй иргэдийг гэрээр эмчлэхээр төлөвлөж байна.

Толгой өвдөх, нус гоожих, хоолой өвдөх, ханиалгах шинж тэмдгээр эхэлж байгаа. Тасралтгүй ханиасантай холбоотойгоор цустай цэрээр ханиах шинж тэмдэг голлож байна. Хүүхдүүдэд шинж тэмдэг тод харагдаж байгаа. Эхний гурав хоногт халуурч, ханиалгаж байна. Мөн хэвлийгээр өвдөх, суулгах, бөөлжих зэрэг шинж тэмдэг илэрч байгаа" гэлээ.