Дизель түлшний 7 дугаар сарын хил үнэ оны эхнээс 84 хувиар өсжээ

2022 оны 6 дугаар сард дэлхийн зах зээл дэх газрын тосны үнэ баррель нь 110-120 ам.долларт хүрч, оны эхэнд манай улсад нийлүүлэгдэж байсан дизель түлшний зах зээлийн үнэ 705 ам.доллар байсан бол 7 дугаар сард 1295$ болж 84%-р өсөөд байна. Энэхүү үнийн өсөлт шатахуун импортлогчдод хүндхэн тусч дараа сарын хангалтаа татан авахын тулд үнээ нэмэхээс өөр аргагүйд хүрчээ. Дотоодын зах зээл дээрх дизель түлшний жижиглэнгийн үнэ 1 литр тутамд 2840 төгрөгөөс 4030 төгрөг болж 41.9%-р өссөн нь зах зээлийн ханшийн өсөлттэй харьцуулахад 2 дахин бага байгаа юм.

Засгийн газраас үнийн өсөлтийг сааруулах арга хэмжээний хүрээнд өнгөрөгч 4 дүгээр сард дизель түлшний онцгой албан татварыг “0” төгрөг, Аи-92 автобензиний гаалийн албан татварыг “0” төгрөг болгосон. УУХҮЯ-ны зүгээс ОХУ-ын Роснефть компанитай Аи-92 шатахууны үнийг хямдралтай нөхцөлөөр худалдан авах хэлцэл хийх явцад дизель түлшний үнийг бууруулах талаар санал тавьсан боловч нийлүүлэгч талаас дотоод нөхцөл байдлын улмаас түлшний хэрэглээ өссөн учир хөнгөлөлт үзүүлэх боломжгүй харин нийлүүлэлтийг тасалдуулахгүй байхад анхаарна гэдгээ илэрхийлжээ.

Дизель түлшний импортын дийлэнх буюу 70%-ийг бөөний худалдан авагчид буюу уул уурхай, зам, барилгын компаниуд хэрэглэдэг бол Аи-92 бензиний үндсэн хэрэглэгчид нь иргэд байдаг байна.