Сүхбаатар дүүргийн ИТХ-ын дарга Б.Энхболд албаны машиныг хувийн хэрэгцээнд ашиглажээ

Одоогоос таван жилийн өмнө буюу 2018 оны есдүгээр сард төрийн албаны машиныг хувийн хэрэгцээнд ашиглахгүй байхаар журамлаж байсан юм. Үүний гол зорилго нь төрийн бүх шатны байгууллагад сахилга хариуцлага, дэг журмыг чангатгаж, хариуцлагатай, ил тод, мэргэшсэн, тогтвортой төрийн албыг төлөвшүүлж, иргэдийн төрд итгэх итгэлийг бэхжүүлэх зорилгоор гаргасан. Төрийн албаны машиныг хувийн хэрэгцээнд ашиглахгүй байх, ёс зүйн хороо байгуулах зэрэг зохион байгуулалтын ажил ч хийж байсан удаатай. Тэгвэл баяр наадмын өмнөх долоо хоногийн ням гарагт нийслэлийн Сүхбаатар дүүргийн ИТХ-ын дарга Б. Энхболд албаны машиныг хувийн хэрэгцээнд ашиглажээ. Энэ нь төрийн албаны холбогдох дүрэм журамд заасан зохицуулалтыг зөрчсөн үйлдэл юм.